Во оваа прилика беа истакнати успесите на учениците во изминатата година, кои беа во голем број, наградите постигнати на регионални, државни и меѓународни натпревари, учествата во проекти и ученички размени, како и голем број други воннаставни активности кои се реализираа. Активностите за одбележување на патрониот празник започнаа со меѓугенерациски спортски натпревари во ракомет и кошарка кои се одиграа во училишната спортска сала. Следуваше учеството во едукативната изложба на плоштадот Магнолија, наречена "Прошетка низ Сончевиот систем", во соработка со географското друштво „Геосфера“ и Астрономското друштво од Битола. Прославата продолжи со приредба во НУ Завод и музеј Битола. На свеченоста се реализираа повеќе активности и тоа: Изложба и модна ревија изработена од ученици, вклучени во проектот,, Моја традиција, моја инспирација''реализиран во соработка со НУ Завод и музеј Битола, исто така беше претставена и историска изложба насловена како ,,100 години од Македонскиот фронт'', а дел од програмата беше и аукциска изложба и продажба на дела насликани од вештите раце на учениците. Самиот настан беше збогатен и со две претстави ,, Различни, но сепак исти'', која беше драматизација на книгата што две ученички ја издадоа пред една година, како и претставата ,, I hate Shakespeare “, изведена на англиски јазик. Изведен беше и модерен танц, проследен со DJ кој се погрижи за музичкиот дел во текот на целата приредба. На крајот, одбележувањето продолжи со музичка програма, наречена ,,Македонска рок вечер'' со училишните бендови.