„По реконструкцијата тротоарите и нивното поплочување, новиот изведувач започна со асфалтирање на улицата.И покрај сите препреки со кои се соочи Општина Битола во изминатите осум месеци, по преземените законски дејствија со кои во најтранспарентна постапка се избра новиот изведувач, се одвиваат завршните фази во реконструкцијата на оваа улица“, соопштија од Општината.

Во изминатите десетина дена, екипи од фирмата „Еуроинвест“ работеа на геодетско снимање и исколчување во функција на израмнување, а паралелно и на поставување на тротоарот. По асфалтирањето, ќе следува и партерно уредува на оваа улица.

Реконструкцијата на улицата започна лани во септмеври кога јавните претпријатија промената на водоводната и канализационата мрежа ја направија за брзо време, по што требаше да се асфалтира улицата. Но, роковите беа пробиени, па општината го тужи изведувачот , побара активирање на банкарската гаранција, поставување на негативна референца, а најавија и дека адвокат ќе отвори процес за обесштетување на Општината и на граѓаните.

Воедно и фирмата изведувач поднесе тужба зашто не им било платено сработеното.

Од Општина Битола во неколку наврати изјавија дека и во следниот период нема да дозволат изведувачи да ги пречекоруваат договорените рокови.