-Акцијата ја започнавме со поддршка на учениците и родителите. Во десет дена се бојадиса цело училиште. Започнаа родители на двајца ученици, а потоа се приклучија сите. Некои донесоа боја, други испратија мајстори. Се организираа учениците од сите класови, а на  крај  сите заедно го средивме нередот  и работата ја завршивме во рекордно време. Искршените врати ги заменивме со нови кои ги донираше РЕК Битола, од Ротари клубот донираа столици, а парното греење во спортската сала кое никогаш не проработи  сега е ставено во функција со помош на  екипа која беше испратена од општина Битола, изјави Билјана Кокалевска, директор на средното медицинско училиште „Д-р Јован Калаузи“ во Битола

Таа по доаѓањето на функција на  2 декември минатата година ги отвори вратите од училиштето за новинарските екипи кои ја регистрираа катастрофалната состојба- извадени и искршнеи врати од училниците, без брави и кваки, кои се потпираа со столче од надвор. Во училниците, на подот и ѕидовите имаше дупки, дел од столчињата и клупите беа искршени, компјутерите оштетени, на прозорците висеа завеси, парното греење беше во дефект.

Тогаш менаџерскиот тим испрати апел до сите родители, компании и институции да помогнат за санирање на ваквата состојба затоа што училиштетото го наследи  со  блокирана сметка  и долг од половина милион евра од поранешната директорка   Јасмина Ниќиќ Десановска, која  е  меѓу 22 обвинети за злоупотреби на школскиот превоз за сума од 360.000 евра во случајот „Транспортер“, каде првообвенет е ексградоначалникот Владимир Талески.

Градоначалничката Наташа Петровска,  на својот ФБ профил објави фотографии од училиштето пред и по санирањето на состојбата и напиша:

„ПРЕД-ПОТОА, МЕДИЦИНКО УЧИЛИШТЕ-Човечкиот фактор и менаџерскиот тим се исклучително значајни за успешно функционирање. На сликите подолу може да се види само еден дел од претходната состојба и сегашната во медицинското училиште во Битола. Промени за исклучително краток период. Променети врати на училници, бојадисани училници, поставени завеси, санирани подови... Најважната - по 7 години загреана спортска сала! Можело ако се сака! Сликите најдобро говорат. Се гордеам со досегашните промени на новиот менаџерски тим“