Кампањата опфаќа средба со писатели, читање на книги од познати личности, едукативни работилници за деца и родители итн. На денешнот настан беа присутни над сто ученици од основните училишта од Битола „Стив Наумов“, “Гоце Делчев“ , децата од градинката „Естраја Овадија Мара“и деца кои го посетуваат „Сумнал“ .

„Следењето на модерните текови е резултат на нашите настојувања, библиотеките да работат во пресрет на потребите на заедницата, особено на најмладите учесници како наши идни корисници. Со цел да се популаризира книгата и читањето од најмала возраст потребно е примена на нови форми и методи кои се прифатливи за нивната возраст, причинувајќи им задоволство и воодушевување и тоа преку игра и забава и користење на соодветен дидактички материјал“, рече м-р Јелена Петровска директорката на НУУБ „Св.Климент Охридски“ – Битола.

Проектот на УСАИД „Со читање до лидерство“има за цел да го подигне интересот кон читањето и математиката кај најмладите ученици и да ја вклучи целата заедница во овие активности со децата. За таа цел градот го посети таканаречената Библиотека на тркала. Таа е специјално пренаменето возило, опремено со книги и дидактички материјали за читање и математика со кое ги посетува училиштата од сите региони во државата за да им овозможи пристап до материјали за учење

„Читањето е забавно. Тоа е клучна вештина која ни помага да учиме и да го живееме животот – и затоа започнувањето со читање е возбудлива и важна фаза од развојот на децата. Да им овозможиме на децата редовни дружби со книгата од мали нозе, да им го збогатиме детскиот вокабулар со нови зборови, да ја поттикнеме љубопитноста од најмала возраст, да им ја развиеме способноста за памтење и креативност. Децата се како сунѓери, да им овозможиме нови знаења во забавна и опуштена атмосфера“, рече Фатма Бајрам Аземовска претседателка на „Сумнал“ – Здружението за развој на Ромската заедница.

„Сумнал“ се стреми кон зајакнување на капацитетите на ромската заедница преку подобрување и развој на ромската култура, јазик и традиција како и промоција на позитивните вредности на културата на Ромите како услов за унапредување на современото македонско општество и рушење на стереотипите и предрасудите.