„Постои континуирано уништување на споменици и спомен - бисти. Постојано се случува спомен - бистите да бидат премачкувани со боја и да бидат уништувани мермерните плочи. Во неделата на денот на роденденот на Панде Кајзерот (15.07.2018 година) во Битола неговата спомен - биста е скршена, отстранета и фрлена, а мермерот е видно уништен. Како Сојуз на Борци од НОАВМ и граѓани продолжувачи се прашуваме зошто тоа се случило токму на денот на неговиот роденден? Се прашуваме кој го направи тоа и зошто? Изненадени сме од постапката на оние кои се осмелиле ова да го сторат. Панде Кајзерот како и останатите негови соборци ги дадоа животите за слобода на овој народ и заслужуваат почит. Бараме од надлежнинте органи да ги најдат сторителите и да утврдат која им била целта. Искрено се надеваме дека повеќе нема да слушаме за уништување на споменот на оние кои ги дале своите животи против фашистичките и нацистичките делувања“, пишува во писмената реакција на Општински Одбор на Сојуз на Борци од НОАВМ – Битола.

Сојузот на Борци реагираше со писма до Општина Битола, ЈП „ Комуналец “ - Битола и СВР - Битола со барање спомен - бистата да се врати во првобитна состојба.

„Се надеваме дека надлежните органи ќе ги пронајдат сторителите и случајот ќе биде расчистен“, велат од Сојузот на Борци.

Засега непознати сторители ноќта саботата спроти неделата, на 15 јули, денот кога е роден народниот херој Панде Кајзеро, ја осквернавија неговата биста во дворот на месната заедница на улицата „15 Корпус“ во Битола. Најпрво била удирана, па откорната од мермерниот постамент кој е оштетен, а оштетувања има на главата и рамената на бистата. Случајот е пријавен во полиција, која  извршила увид и направила записник.