„Отворивме центар за видео надзор, односно го осовременивме постоечкиот компјутерски центар, и од најдалечната точка, односно 40 километри од браната до грчка граница, ќе имаме можност преку видео надзор да ја пратиме целата техника и технологија што значи и последниот зафат од хидро системот ќе ни биде обезбеден со видео надзор“, рече директорот Менде Граматковски.

Граматковски изјави дека во хидро системот имаат околу 75 милиони кубни метри вода, па ќе има доволно вода за сите водокорисници.

„Со домаќинско и рационално трошње оваа година успешно ја завршивме сезоната. Во јуни имавме 105 милиони кубни метри вода, а сега 75 милиони кубни метри вода. Сите водокорисници на време беа услужени и за идната година се подготвуваме, па корисниците не треба да имаат грижа, ќе има вода за сите водокорисници. Во овој момент вода се испорачува за РЕК Битола, ЈП Водовод и индустријата“, рече Граматковски.

Тој во придружба на пратеникот Александар Кирацовски и директорот на ФОД Методија Тасевски ја посетија и браната крај село Црнеец. Кирацовски изјави дека Стрежево е еден од најзначајни објекти во земјава бидејќи хидро системот со пивка вода ја снабдува Битола, битолските граѓани, битолската околија, со технолошка вода македонскиот најголем енергетски комбинат РЕК Битола заедно со останатите околни фабрики. ЈП Стрежево обезбедува живот за Битола и битолската околина, рече тој, па вети дека стои на располагање да помогне во натамошниот развој на претпријатието.

„ЈП Стрежево е едно од најзначајните претпријатија во оваа околина, еден од најголемите капитални објекти којшто има влијание и врз туризмот и врз енергетиката и врз земјоделието и врз човековото живеење тука. Како пратеник и како генерален секретар на најголемата владеачка партија стојам комплетно на располагање и ќе настојувам ова јавно претпријатие да се зачува комплетно, да се работи домакински, особено како во последната година и половина, и да се унапредува максимално можно“, рече Кирацовски.