Најпрво се одржа еко час на отворено на кој учениците се запознаа со правилата за движење во природа, со убавините во мариовскиот крај и начинот на кој можи да се заштитат и чуваат природните убавини. Потоа во групи се чистеа патеките низ селото и патеките кои водат кон Филмскиот мост. На одредени места се поставија и еко канти.

„Од мала возраст негуваме и градиме позитивни особини и чувства кон природата. Ние сме дел од неа и вака работно го одбележуваме Денот на планетата Земја, патронот на нашето училиште и апелираме за поголема еколошка свест“, рече наставничката Гагаловска.

Иако во село Зовиќ нема многу жители, сепак, низ селото и по патеките кон Камениот мост на Градешка Река имаше расфрлено ѓубре. Местото изобилува со прекрасни пејсажи, чиста еколошка средина и често е посетувано од туристи. Мостот народот го нарече Филмски, откако таму беа снимени сцени од филмот „Прашина“ на Милчо Манчевски.