„Секој кој денес ќе прати некаква пратка, таа ќе биде жигосана со жигот на ФК ‘Преспа’. За сите филателисти и љубители на ФК ‘Преспа’ ова е мал поклон за нашиот јубилеј“, напиша на Фејсбук профилот Чуруковски.

Клубот сега се натпреварува во Третата лига-југозапад, а долги години бил во втората лига, дури и во Првата македонска лига во рамките на поранешната држава. ФК „Преспа“ иако се соочува со недостиг на финансиски средства сепак 100 години е носител на спортскиот живот во Ресен.

„Со помош на одредени луѓе и на Општината, клубот никогаш не бил оставен на милост и немилост. Со наш ангажман и на дел од градоначалниците успеваме клубот да опстои и да се натпреварува. Ресен е мало место, има три-четири големи фирми и тие помагаат на периоди“, рече Зоран Милевски, претседател на клубот.

Клубот со години ги собира и тренира младите таленти од Преспа. Под покровителство на ФК „Преспа“, опстојува и пионерска школа со над 40 деца.

Историјата на клубот почнала на 12 јули 1919, на Петровден, на ледината зад ресенскиот Сарај на Нијази беј. За противник „Преспа“ го имала тимот на воениот гарнизон, сместен во Ресен и победил со 2:0. Оттогаш, како традиција, сите главни мечеви со тимови од соседните градови се одигрувале токму на овој верски празник, со топка од внатрешна гума, која ја донел учител од Белград..

Првите иницијатори за заживување на фудбалската игра во Ресен биле занаетчии, трговци и учители дојдени од поголемите градови на некогашна Југославија, како и офицери и ресенски студенти, кои се школувале во европските метрополи Прага, Виена, Грац, Атина, Софија…