„Државната мерна станица Битола 1 е надвор од употреба и се надевам дека во најбрз можен рок ќе биде повторно ставена во функција и граѓаните на Битола ќе имаат увид во аерозагадувањето. Во отсуство на двете државни мерни станици Битола 1 и Битола 2, мрежата на платформата Земи здив е единствениот извор на информации за квалитетот на амбиенталниот воздух во Битола. Алармиравме пред некој ден кога имаше нагло зголемување на вредностите и дека една од можните причини може да биде дефект на инструментите за мерење, бидејќи на 18.03.2019 година имавме слична ситуација со мерната станица Битола 2 пред да ја исклучат од мрежата“, реагираат од „Земи здив“.

Тие се надеваат дека ќе добијат одговор од Министерството за животна средина за причините поради кои Битола 1 прекина да ги прикажува податоците на веб порталот.

Во однос на мерната станица Битола 2 која не покажува податоци за ПМ 10 честички од 18 март годинава, „Земи здив“ искористувајќи го правото за слободен пристап до информации поднеле барање да им се одговори која е причината за настанатата ситуација. Одговор од ресорното Министерство добиле во мај дека станува збор за комплексен дефект на инструментот за мерење кој ќе биде пратен на поправка кај производителот на опремата. Во одговорот пишува дека биле остварени контакти со производителот и добавувачот на опремата, па по сервисирањето и калибрирањето на инструментот тој ќе се врати во мерната станица. Нема одговор кога тоа ќе биде направено.

Платформата „Земи здив“ овзоможува да се следи квалитетот на воздухот преку мрежата од седум сензори на различни мерни локации во градот Битола.