По долги дискусии и повеќе долги паузи, на денешната седница на Совет не беше усвоен кварталниот извештај за буџетот на Општина Битола за првиот квартал од 2023 година. За извештајот гласаше коалицијата на ВМРО-ДПМНЕ со 13 гласа, исто толку гласа имаше опозиционата СДСМ со коалицијата, односно 13 гласа против, а петте советници од Левица и Поинаку гласаа воздржано.  

Советот на Општина Битола за првпат прифати на дневен ред да се стават точки со одлуки за разрешување на управните и надзорните одбори на јавни претпријатија кои се во долгови, и тоа по предлог на советник од опозицијата. Методија Илиевски, координаторот на советничката група на СДСМ и колаицијата, кои се во опозиција во Советот, предложи да донест одлуки за разрешување на управните и надзорните одбори на шест јавни претпријатија и тоа, Водовод, Комуналец, Жабени, Паркинзи, Пазари и Културно-информативниот центар кој управува со Офицерскиот дом и Киното „Манаки“. Советниците од локалната власт предводен од ВМРО-ДПМНЕ и коалиционите партнери се спротивствија, но точките ги поддржаа сите останати советници од СДСМ, ДОМ, Поинаку и Левица, со што ја надгласаа локалната власт.

„Се надевам дека денес сите ќе се одважиме да го изгласаме предлогот, да ги разрешиме управните и надзорните партиски одбори за на следната седница управните и надзорните одбори да ги донесеме на Совет составени од партиципиенти кои сите ние ќе ги предложиме. Ова го предлагам само од една причина да ги спасиме јавните претпијатија зашто ве убедувам ако ги оставиме овие одбори и ако продолжат да работат со истиот стил на работа во следната година ќе треба во овие претпријатија да прогласиме стечај или да книжиме уште поголеми загуби“, рече Методија Илиевски од СДСМ.

Ѓорги Ѓоргиевски од ВМРО-ДПМНЕ рече дека не е земен во предвид членот 17 од Законот за јавни претпријатија кој предвидува основачот да ги разреши сите членови на управниот одбор пред истекот на мандатот доколку не даде согласност на годишната сметка и извештајот за работењето на јавното претпријатие, за што е дадена согласност.

Но, реагираше претседателката на Советот, Габриела Илиевска од независната граѓанска иницијатива Поинаку, која укажа дека тие точки уште не се излезени во службен весник и не се знае дали ќе добијат сопгласност бидејќи во тече жалбена постапка.

Тоа се всушност точките за завршните сметки на јавните претпријатија кои беа изгласани од страна на ВМРО-ДПМНЕ, Левица и ДУИ на спорната седница на 20 април која Илиевска ја прекина, а овие избраа друг претседавач на седницата.

Ѓогиевски бараше точките воопшто да не бидат ставени на гласање, а Илиевска му возврати „тоа моежете да го сторите кога Вие ќе бидете претседател на Совет“. По ова се состана Комисијата за статут и прописи, но и таму власта беше надгласанна, па точките се ставија на дневен ред, а за нив ќе се дискутира доцна попладнево зашто седницата има 69 точки, а тие се оставени за последни.

Ж.ЗДРАВКОВСКА

Препознатливиот далматински мелос, на 2 јуни во петок во Офицерскиот дом во Битола ќе го донесе далматинската машка клапа „Жрновница“, а по повод Денот на државноста на Хрватска. Настанот е со почеток од 19 часот.  Оваа манифестација веќе традиционално е во организација на  Хрватскиот културен центар и Македонско -хрватското друштво „Марко Марулиќ“ – Битола, а оваа година во соработка со КИЦ.-Офицерскиот дом.

Клапатa „Жрновница“ доаѓа од истоименото место, предградие на Сплит, Хрватска. Континуирано работи од 2008 година, а е основана од нејзиниот долгогодишен водител, маестро Марко Марин. Имаат учествувано на многу фестивали, концерти во Хрватска и во странство, настапувале во Франција, Италија, Црна Гора, Босна и Херцеговина, на Хрватскиот музички фестивал во Виена, Австрија, Словенија, Чешка и со задоволство како што ни изјавија, настапуваат на бројни хуманитарни и други културни настани.

Клапата негува полифоно пеење на далматинскиот мелос, а во својот репертоар, покрај традиционалните „а капела“песни, изведуваат и далматински песни со инструментална придружба на мандолина, гитара и бас. Изведуваат композиции од духовен карактер, класични композиции, аранжмани на популарни композиции, а негуваат и традиционално народно пеење.

Во програмата за одбележување на овој значаен празник за хрватската историја, народниот театар од Сињ ќе ја изведе претставата „Семејна идила“ од М.Ненадовиќ, адаптација и драматизација на Жељко Вицулин.  Премиерата на оваа претстава беше минатата година, а по барање на публиката досега е изведена над 20 пати во Хрватска. Народниот аматерски театар од Сињ е основан во 1956 година. Во сите овие години од нивното постоење подготвиле повеќе од 160 премиерни изведби. Овие бројки покажуваат дека овој театар и покрај кратките прекини, е еден од најактивните аматерски драмски театри во Хрватска. Во последните 10 години, со континуирана и професионална работа, театарот се издигна на едно повисоко ниво по бројот на поставени премиерни претстави, како и во учества на фестивали. На одбележувањето на нивното 60 годишно постоење ја добиваат Наградата на Сплитско-Далматинскиот округ за културна промоција на градот и регионот во Хрватска и странство.

Учениците од Гимназијата „Јосип Броз –Тито“ уште еднаш ја потврдија својата драмска и театарска умешност, подготвувајќи театарска претстава во која режијата, сценариото, улогите, кореографијата, костимографијата и другите пропратни елементи ги подготвија и ги изведуваат учениците. Претставата „Далеку, а сосем тука“ е под менторство на професорката по клаични јазици Софија Бејковска. Режијата и сценариото се на матурантката Бисера Стефановска, а како асистен на режија и сценарио се јавува Ангела Цветковска и асистент на сценарио Ана Марија Петровска.

Премиерата за вработените од Гимназијата е закажана за 31 мај, на летната сцена во Тумбе кафе, а следните два дена, на први и втори јуни, ќе има реизведби за учениците од Гимназијата. 

Се насетува крајот, кога заокружуваме уште една учебна година. Заклучно со 14 јуни, остануваат уште нецели три седмици, кога полуматурантите ќе бидат пред предизвикот наречен: запишување во идно средно образование, а на останатите ученици, ќе им започне летниот распуст. Наставна година исполнета со многу наставни и воннаставни активности, предизвици, зачестени апликации на Еразмус проекти и уште многу други тековни работи. Вложениот труд, на крајот секогаш се исплаќа.

Во овој текст, ќе го насочам вниманието на две точки: одговорноста на наставникот и одговорноста на ученикот.

1.Одговорноста на наставникот

Лично за мене, одговорен наставник е оној, кој:

-работи со многу љубов и волја во својата наставничка професија;

- почитува училиштен Кодекс;

- секогаш позитивно размислува пред многуте негативни соочувања;

- верува дека работите секогаш можат да бидат подобри;

- ги извршува сите задолженија дадени од директор на училиште, стручна служба итн.

- си ја гледа својата наставна работа и гради професионален однос со колегите (значи, не трачари, не завидува и сл.);

- има цел од ученичето, да направи прав ученик со: посветена, трпелива и макотрпна работа;

- професионално се надградува, користејќи искуства од повозрасни колеги, како и искуства од други училишта во нашата земја и пошироко;

- излегува секогаш во пресрет на колегите кога треба да им помогне, да ги замени кога се отсутни и сл.

- не се жали дека му е напорна работата, или пак, како ќе се издржат 7 наставни часови денес;

- е способен и квалитетен во својата наставна област, а доследно и точно, дава одговор на поставено прашање од научната област;

- има задоволство да учествува на настани поврзани со предметот/предметите што го/ги предава (натпревари, патронат, екскурзии...);

- предложува наставни и воннаставни активности што би биле од добробит за самото училиште, па и за градот каде што се наоѓа училиштето;

- сака да соработува со локалната самоуправа и да даде допринос во функционирањето на образовната дејност;

- има чест да комуницира со родителите за нивните деца и постигнувањата на училиште...

- постојано не препрашува дали имало плата или не (нормално дека ќе има, за тоа работиме, законска должност е вложениот труд да се плати).

И така, наставникот има уште многу други обврски и одговорности (не само, горенаведените 16) кои треба: посветено, професионално и етички да ги извршува. Но, ќе оставам нешто и за следна прилика.

1.Одговорноста на ученикот

Лично за мене, од одговорен родител, произлегува и одговорен ученик, кој:

-мора да почитува училиштен Кодекс, наменет за него;

- води сметка за културата на изразување и комуницирање со соучениците и со наставниците, па и воопшто;

- ги извршува сите активности поврзани со наставните предмети што ги задава наставникот и самото училиште;

- не се спротивставува и разбрано се однесува;

- со задоволство учествува на: натпревари, патронат, активности поврзани со наставата и вонучилиштни предизвици;

- покажува интерес за: додатна, дополнителна настава, како и секции...;

- максимално го користи својот потенцијал и дар што го поседува, во давање на најдоброто од себе,

- континуирано учи, а не само пред тест и испрашување;

- не се „пазари“ за оценки, кога точно знае колку може да постигне;

- слуша наставник и прима добронамерен совет, кога навистина е потребен;

- се истакнува и се докажува со своите: знаења, интереси, вештини, способности...;

- дава конструктивни предлози за подобрување и напредување на училиштната клима;

- е културен и цивилизиран пример не само во училиштето, ами секаде;

- соработува со наставниците, а не се ограничува на еден или двајца наставници;

- не манипулира, не се расправа, не подлегнува под негативно влијание (на соученици, или пак некој друг во училиштната средина);

- секогаш и секаде позитивно и радосно го претставува своето училиште и наставниците.

Одговорноста на ученикот, многу значи и треба да биде стабилна и во најдобро светло прикажана. Настрана од технолошката зависност (мобилен телефон, социјални алатки, компјутер и сл.) ученикот има обврска да остане: добар и за пример и никако поинаку! Затоа, како што почнав погоре, најважни се: влијанието и улогата на домот, од каде што ученикот тргнува. Ако се влијае воспитно, тогаш нема да имаме проблеми, но ако се допушти слобода на однесување (каква што ја гледаме и доживуваме), тогаш проблемите само ќе растат, а нема да се решаваат.

За крај на овој мој текст, Драги ученици: Ви го честитам постигнатиот успех на училиште (запомнете, за Вас учите и можете многу да постигнете); имајте добро лето, но не заборавајте: читајте и другарувајте со книги, богатете го речникот и културата на изразување. Негувајте ја македонската белетристика. Оставете ги настрана социјалните мрежи, или паметно користете ги. И одете по разумен и нормален пат во животот! Верувајте дека е исплатливо и корисно! Останете: среќни, паметни и добри!

Автор: Александар Адамовски, професор по македонски јазик и литература и француски јазик

На 26 и 28.05.2023 полициски службеници од криминалистичката полиција и полициската станица од општа надлежност при СВР Битола по преземени мерки и активности на подрачјето на Битола пронајдоа и им вратија на сопствениците претходно украдени предмети. Имено, од правно лице од Битола биле одземени предмети од нива во атарот на с.Могила, а од А.Т.(31)  од  Битола од вело-паркинг на ул.„Столарска“ во Битола, бил одземен велосипед, негова сопственост, кои биле пронајдени и вратени. Се преземаат мерки за целосно расчистување на случаите, по што ќе бидат поднесени соодветни поднесоци.

И во европски рамки, но и кај нас коефициентот на повреди кај младите луѓе е за 40 отсто повисок за разлика од возрасните работини групи што е доста алармантно. Процентот се должи на недоволната информираност на младите во однос на безбеднопста и заштитата при работа при првото вработување. А втората работа е што младите не обрнуваат многу внимание на оваа тема, а мора да се посочи и недоволната присустност на безбедноста како тема во курикулумите од најмала возраст, па се до академското образование, рече Алекасандар Тодоровски од МКЦ Битола, кординатор на проектот „ Безбедност и здравје при работа за млади” за време на завршната конференција во Битола.

Целта на оваа завршна конференција беше во финалната фаза од проектот да се вклучат сите релевантни чинители и да се споредат постоечката политика и реалната состојба за безбедност и здравје при работа за млади како и влијанието на активностите кои се преземени во средните стручни училишта во Битола. Финалните препораки од Конференцијата за унапредување на политиките и практиките за безбедност и здравје при работа за млади ќе бидат испратени до Министерството за образование и наука и други релевантни институции.

На настанот свое обраќање во однос на Безбедноста и здравјето при работа со фокус на млади имаа Гордана Ноческа- Стручно лице за БЗР од Логaритам ДОО Прилеп на тема “Подобрување на безбедноста и здравјето при работа на младите работници” и Ред. Проф. д-р Иво Кузманов од Технички Факултет – Битола на тема “Безбедност и здравје при работа за млади”.

„Најголем причинител на повредите е невниманието, особено кај младите лица, кај повозрасните лица искуството прави да занамруваат голем број фактори. Најголем број на повреди процентуално има кај најискусните вработени, 50 плус години, пред фаза на пензионирање кога мислат дека знаат се и тогаш се случува онаа критична повреда. Кај младите повредите се помалку како бројка, како резултат на невнимание, но повредите се потешки неискуството си го прави своето“, рече Кузманов.

Тој додаде дека професијата заштита при работа станува дефицитарна. Од 908 стручни лица во Македонија дури 98 проценти се над 40 години и се при крај на работниот век. Многу малку лица се занимаваат со оваа професија, а вакви експерти треба да има по сите компании кои работат со производство.

Младински културен центар - Битола во овој проект ја согледува можноста да ги вклучи младите во реализацијата Националната стратегија за безбедност и задравје при работа 2020 на локално ниво, но и да ги вклучи сите релевантни чинители на локално ниво најмногу во интерес на креиреањето на безбедни работни места за младите при нивното вработување. Општата цел на проектот е подобрување на вклученоста и влијанието на граѓанското општество во јавните политики за безбедност и здравје при работа, додека специфични цели се: подигнување на свеста за значењето на безбедноста и здравјето при работа кај средношколците, подобрување на нивото на знаење за улогата, потребата и значењето на безбедни и здрави работни позиции и развој на култура за превенција кај средношколците и учество во реформските процеси за безбедност и здравје при работа во средните стручни училишта.

Овој проект е дел од проектот “Подобрување на работните услови и безбедноста и здравјето при работа како поддршка на земјите од Западен Балкан за пристапување кон Европската Унија„ финансиран од ЕУ, имплементиран од Македонското здружение за заштита при работа.