Читајќи песна од битолскиот поет Панде Манојлов наречена „Душа“, градоначалникот на Битола, Тони Коњановски, ја заврши денешната прес конференција на која го обвини како што рече, новото советничко мнозинство за незаконско одржување на седница, донесување на незаконски одлуки за разрешување на управни тела во јавните претпријатија и за иницијативи за разрешување директор за што немаат надлежност, а значат мешање во неговите ингеренции.

Коњановски рече „бидејќи е крај на викендот, би ве замолил за кратко заедно да ја проследиме, ова е многу поучна песна која е добро да се чуе“:

„Душата тежела само 21 грам,

така покажаа испитувањата

од пред стотина години.

Во 21 грам собрано е се,

и љубов и среќа, и добрина и надеж.

Во тие 21 грам не се пресметани

омразта, зависта, гневот и лошотилукот,

За нив нема мерка што ќе ги измери“, прочита Коњановски.

Тој рече дека од неговото доаѓање, како градоначалник на Општина Битола, главен приоритет му е работа и посветеност во работењето, во интерес на Битола како град во интерес на сите битолчани. Во ниту еден момент не помислив дека мојата работа треба да се сведува на собирање политички поени или манипулирање на граѓаните, како што тоа се прави од одредени структури во Советот на општина Битола.

Првата професионална претстава на македонски знаковен јазик „Улаф сте (Are you crazy?)“ во продукција на битолскиот АТО – Центар за современа уметност и култура, а во режија на Јован Ристовски при вчерашната изведба на Драмскиот факултет во Скопје, ја погледнаа и претседателот Стево Пендаровски и министеркста за труд и социјална политика Јованка Тренчевска. И двајцата изразија целосна поддршка за пораките ор претставата која бара стандардизација на македонскиот знаковен јазик и поголеми права за лицата со оштетен слух.

„Честитки до целата екипа на „Улаф сте?“, за реализацијата на првата професионална претстава на македонски знаковен јазик за возрасни лица со оштетен слух. Преку синоќешната изведба на претставата на Драмскиот факултет во Скопје, актерите уште еднаш побараа стандардизација на македонскиот знаковен јазик и поголеми права за лицата со оштетен слух, за што, од мене, имаат целосна поддршка“, напиша претседателот Пендаровски на својот ФБ профил.

„Претставата ме потсети на тоа каде сме како општество и уште колку многу треба да работиме за да овозможиме еднакви можности за сите. Да овозможиме социјализација, образование, но и љубов. Претставата зборуваше за работите кои сме ги имале и некаде по пат сме ги изгубиле. Оваа претстава која беше одиграна на знаковен јазик и преведувана на говорен во секој еден гледач пробуди свест за прифаќање на другиот. Задоволството да бидам дел од публиката беше мое“, напиша Тренчевска.

По претставата режисерот Ристовски изјави дека АТО навистина прави општествена промена. „И како режисер и како човек сум пресреќен што после години работа, инспириран од Бертолт Брехт уште како студент, конечно се уверив дека навистина уметноста може да направи општествена промена. Се што е направено со многу љубов и волја, преместува планини“, изјави Ристовски.

Драматург на претставата е Билјана Крајчевска, а меѓу соработниците за знаковен јазик е Мартин Ангелов кој заедно со Радмила Периќ во Битола го имаат отворено првото кафуле и пицерија на знаковен јазик во Македонија кои се викат како и претставата „Улаф сте“.Во претставата играат акатерите Наталија Ристеска, Кристијан Танчевски, Марија Стефановска, Маја Андоновска- Илијевски, Сандра Грибовска и Никола Пројчевски.

Интегрален текст од прес конференцијата на Јадранка Павловска, советник од СДСМ: 

„Се зголемува бројот на кандидати од битолскиот огранок на ДПМНЕ кои сакаат да му прават друштво во прилепскиот затвор на нивниот сопартиец, Владимир Талески!

По одлуките за разрешување на управните и надзорните одбори на јавните претпријатија во Битола, Советот денес изгласа и иницијатива до градоначалникот Коњановски за разрешување на директорот Зоран Михајловски од Јавното претпријатие „Паркинзи“. Ова е прв ваков случај мнозинство советници да изгласа иницијатива за разрешување на директор поставен од актуелната локалана самоуправа, во случајот предводена од ВМРО-ДПМНЕ. Иницијативите кои не се во интерес на локалната власт почнаа да минуваат на Совет откако се распадна претходното мнозионство меѓу ВМРО-ДПМНЕ и независната иницијативва Понаку и Левица. На денешната седница иницијативата ја предложи Елена Кромидаровска, а „за“ гласаа 17 советници од СДСМ и коалицијата, Поинаку и Левица, а со 13 гласови “против’’ се изјаснаа ВМРО-ДПМНЕ и коалицијата.

Иницијативата за разрешување на Михајловски се покрена зашто електричното вовче Мечо кое деновиве беше пуштено во функција, а набавено со општински средства, носи бренд на приватна битолска фирма, а за тоа не бил известен Советот, како и за други работи поврзани со него.

„На одржаната Комисија за финансии и буџет присуствуваше и директорот, го прашавме повеќе прашања, но тој веројатно не сметаше дека треба да добиеме одговор“, рече Кромидаровска.

На комисиската седница, Михајловски, одговарајќи на советнички прашања рече дека од сите битолски фирми само една пројавила интерес да се рекламира, инаку не се работи за донација. „Јас се извинувам пропустот е мој. Ќе добиете детална и јавна информација. Ќе се отстрани брендирањето“, рече Михајловски.

Запрашан зошто кога стигнало вовчето не го информирал Советот, одговори: „За што да бидете известени, дали ве известуваат кога стигнува возило од поправака или се набавува ново, ако сакате ќе ве известуавме за се̍“.

Претседателката на Советот Габерила Илиевска од Поинаку критикуваше дека иако директорот имал шест месеци до Советот доставил само одлука за цената на возење од 50 денари, а не и за траса на возење, работно време...

За советниците од ВМРО-ДПМНЕ иницијативата за разрешување на директорот е уште една од низата незаконски одлуки на новото советничко мнозинство.

„Според Законот за локална самоуправа, Советот нема законски основ за разрешување на директор. Доколку ни треба помош од некоја институција да се обратиме до Инспекторат за локална самоуправа, Државен завод за ревизија , повисоки инстанци, па и да се согласиме дека ни треба мониторинг врз работата на Советот“, рече Ѓорги Ѓоргиевски, советник од ВМРО-ДПМНЕ.

Претседателката Илиевска изјави дека мониторинг е потребен зашто во стаутот е предвидена Комисија за статут и пропис со која претседава токму Ѓоргиевски, а одбива да ја свика и покрај нејзиното барање за да се утврди како натаму ќе функционира Советот. „Инспекторот ќе дојдив  петок да му понудиме да го вработиме овде нека не̍ пази како мали деца“, рече иронично Илиевска.

Ж.ЗДРАВКОВСКА

Долги години, македонското образование се обидува да направи и спроведе некакви реформи, со кои ќе се тргне од некој нов почеток, а притоа ќе се запази она што е традиционално во наставата (материјалот што се изучува, наставните средства, континуиран напредок на дигиталната технологија итн.). До каде сме со реформите? Еве, ќе ја земам обуката спроведена од БРО, одржана на 20 јуни, наменета за сите наставници кои во учебната: 2023-2024 год. ќе го предаваат предметот: македонски јазик во VI одд. за кој е изготвена нова наставна програма за работа на наставните часови. Нови наставни програми, има и по други наставни предмети, но мене ме засегнува мајчиниот јазик кој го предавам. Со што можам да ја пофалам наставната обука која што ја следев, а со што да посочам на нејзини пропусти или недокажаности?

За поздравување е чекорот, што ете советниците од БРО се потрудиле и направиле нова наставна програма за работење по предметот: македонски јазик. Иако, во самата програма, очевидно ја нема темата која што години наназад ја работиме за Историја на македонскиот јазик. Одговорот на ова прашање, од страна на советниците на БРО, беше дека учениците може да ги прошират нивните знаења за историјата на македонскиот јазик, тука вклучително за: глаголицата и кирилицата по предметот историја и дека во VII одд. ќе биде опфатена оваа тема во новата наставна програма и евентуално во новиот учебник (ако се изработи). Едногласно, сите македонисти стоиме против пропустот на оваа многу важна тема, која што учениците мора да ја знаат. Останува на нас, дали на часовите ќе предадеме нешто од историјата на македонскиот јазик. При презентирањето на новата наставна програма, научивме некои нови работи околу самата наставна организација која што треба да ја направеме по насоки дадени од обучувачите од БРО, на пример досега традиционалната Дневна подготовка за наставен час, сега се заменува со Сценарио за час, запишувањето на наставната содржина во е-дневник, која што ќе ја работиме на час, оди заедно со средствата за оценување (што не беше практика досега), наместо 3 постоечки писмени работи, сега ќе треба да работиме 2 писмени состави со учениците, односно најмногу ќе треба да бидеме сконцентрирани на наставните средства и следењето на напредокот на учениците дадени во самата наставна програма. Од самото презентирање и појаснување за наставната програма, можевме да забележиме дека некои наставни теми и содржини се повторуваат како во ланската наставна програма, а некои се нови и дополнети на пример во делот: Наука за јазикот (Комуникација – елементи и видови), Литература (Епика во проза – мит), Медиумска писменост (Слобода на изразување и етичко однесување во дигиталниот простор, Стереотипи на омраза во медиумите и на социјалните мрежи). После секоја наставна тема, дадени се добри примери за активности на часовите, кои имаме слобода да ги користеме, па и да иницираме нови, во широкиот избор кој е понуден. И на крај, во самата програма е посочена инклузивноста, родовата рамноправност, интеркултурноста и меѓупредметната интеграција кои ги имаме опфатено и треба во континуитет да ги продолжеме. Програмата завршува со оценувањата на постигањата на учениците што ги правиме во текот на целата учебна година и овој дел за најголем дел од наставниците е веќе познат. Презентираме нова наставна програма, а не даваме конкретни, јасни одговори за единственото наставно средство – учебник без кој не би можел квалитетно да се одвива наставниот процес. Проблемот со издавањето на учебниците, веќе години наназад доцни, или постои недостиг од учебници, кој се надеваме дека конечно ќе се надмине. Нормално, новата наставна програма за работа, бара и нов учебник, па и други потребни прилози во наставата кои ќе го надополнуваат и надградуваат постоечкиот материјал. Конкретен одговор, за нов учебник по македонски јазик за VI одд. во новата учебна: 2023/2024 год. нема! Револт, кај најголем дел од наставниците, а уште понесериозно тврдење на советниците од БРО, дека не е во нивна надлежност издавањето на учебници (во ред, но барем можевте да се информирате и да ни пренесете на обуката). За да биде проблемот во драмска фаза – кулминација, директорот на БРО, прашан на новинарско прашање околу издавањето на нов учебник по македонски јазик, кажува дека не чувствува лична одговорност, но се надева дека до почетокот на новата учебна година, учебник ќе има. Добро, останува да видеме, иако не верувам дека ќе се успее со печатењето на новиот учебник (впрочем, не е еден предмет, повеќе се). Оттука, сите наставници ќе се снаоѓаме кој како знаеме и умееме. Нели, мора да почнеме со првите наставни часови во септември. Како што претпоставувам, а мислам дека не грешам. Сепак, ќе покаже времето. Што ми е целта во оваа колумна? Кога се пристапува на изработка на нова наставна програма по некој предмет, мора доследно да се запазат авторските права и процедури при навремено издавање на ново наставно средство (конкретно, учебник) согласно со таа програма која што ќе треба да се применува. Не може да презентираме нешто, ако пред нас го нема помошниот материјал. Истото се однесува и за наставните часови од септември. Ќе треба ли копии да правиме? Ќе треба ли стари учебници да користеме? Ќе треба ли дополнителни трошоци да правеме? И уште многу прашања кои уште од сега се јасни. Искрено, посакувам да ни се излезе во пресрет на сите нас, кои предаваме во настава и да ни се одмалат барем трошоците кои континуирано ги даваме за: тестови, наставни ливчиња, слики, помагала во наставата, копии и копии... Значи, кога се прави една наставна реформа, таа треба да биде комплетна (квалитетна и целосна) и да не претрпи никакви забелешки. Дури тогаш ќе бидеме чекор напред, а до тогаш, ќе го даваме нашиот чесен и искрен глас, кој реално не се слуша и не допира многу до надлежните. Само со добра професионална соработка, резултати ќе има!

За крај: ретко кога, се излегло во пресрет на барањата и предлозите на наставниците (потажно е, што никој со нив, за ништо не се консултира), токму со тие кои се трудат и го даваат најдоброто од себе, кои сакаат да го направат светот подобар, кои не откажале никаква наставна послушност и кои се одговорни и доследни во она што го работат. Точно дека, наставничката професија не е за секого, но имаме многу искусни и квалитетни наставници во секој поглед. Но, за тоа во некоја следна прилика. Паметно е, што почнавме со реформите, но, да не дозволуваме нивни значајни пропусти, уште на самиот почеток на нивно спроведување во пракса.

Автор: Александар Адамовски, професор по македонски јазик и литература и француски јазик