По повод 5 Декември – Меѓународниот ден на волонтерите, Младински културен центар – Битола во склоп на проектот „Локален волонтерски сервис Битола“ организираше јавна дискусија „Волонтирање на фестивали vs. волонтирање во заедницата“. Целта беше да се разговара за предизвиците и трендот на младите да волонтираат на фестивали и да се дискутираат различните методи и алатки кои можат да ги мотивираат младите како да се активираат во волонтирање во заедницата. На дискусијата беа презентирани искуствата на граѓанските организации, општина Битола, јавни институции и волонтери за ангажман на волонтери во своето работење. Беше истакната заложбата за унапредување на системот за квалитетен волонтерски менаџмент во организациите како основа за подолгорочен ангажман на волонтерите и нивно задржување за волонтирање во заедницата.

„Сакаме да видиме како да го подобриме системот на квалитетен волонтерски менаџмент за младите кои се активираат за волонтирање на фестивали, како да ги задржиме, како да имаме континуирани активности во текот на целата година за да може младите да придонесат за доброто во локалната заедница. Тоа е еден предизвик со кој граѓанските организации се соочуваат во последен париод, имаме голем интерес за младите да волонтираат, но тоа се претежно ад хок активности, кракорочни, сакаме да дадеме поттик да организираме програми кои ќе значат активирање во текот на целата година“, рече Златко Талевски од МКЦ.

Марија Мерковска- Крушаревска, координаторка на проектот, рече дека важно е да се мотивираат младите да волонтираат во слободното време, а на тој начин да ги зајакнуваат личните знаења и вештини.

„Сакаме да иницираме да се развие повторно волонтерството кај младите во заедницата. Да ги мотивираме повторно да се вклучат во волонтирањето во заедницата, со цел да ги развијат своите вештини и активности, но и да го дадат својот придонес во развојот на заедницата во своето слободно време“, рече таа.

На настанот се додели и националната награда „Златен сертификат за волонтерство во 2022 година“ што од 2006 година, традиционално ја доделува Младински културен центар – Битола. Златен сертификат за волонтерство 2022 година добија Димче Каневче – активист, хуманитерец и волонтер од Охрид и „Кромберг и Шуберт“.

Каневче поддржува институции за стари лица и за деца, поддржува семејства и поединци, подава рака секаде каде што е потребно, обединува бизниси и поединци од цела држава и надвор од неа. Димче има иницирано и поддржано многу донации и акции за донирање на училишен прибор, облека, обувки, очила, организација на тематски детски родендени, илјадници дневни оброци, постелнини, компјутери, телеизори. Негова карактеристика се добротворните журки кои ги организра и со кои придонесува за видливо подобрување на условите за функционирање онаму каде што е најпотребно.

„Наградата многу ми значи бидејќи цел живот волонирам и покрај сите професионални обврски помагам на социјално загрозени лица и други категории кои се справуваат со проблеми во секојдневното живеење. Ова е поттик голем за понатаму да се работи, посебно ми е драго што наградата доажа од МКЦ си кои сме биле колеги“, рече Каневче.

Златен сертификат за волонтерство 2022 се додели за волонтерската акција „Крошу шума“ на Кромберг и Шуберт. Кромберг и Шуберт е компанија која во ноември 2022 година ја реализира волонтерската акција во која 5300 вработени засадија 5300 садници во областа Бел Камен - Крклино. 

Здружението на лица со телесен инвалидитет на Битола, Демир Хисар и Ресен - МОБИЛНОСТ БИТОЛА и Фондацијата за нови технологии, иновации и трансфер на знаење ГАУС Институт – Битола, по повод Меѓународниот ден на лицата со попреченост – 3 Декември и одбележувањето на 35 години МОБИЛНОСТ БИТОЛА, имаат чест и задоволство да Ве поканат на промоција на алатки за пристапен туризам, наменети за лицата со попречености. 

На настанот ќе се промовираат:          

• Туристичка сигналитиказа 10 најзначајни културно-историски споменици во Битола наменета за лица со попречености, кои ќе бидат предадени на Општина Битола за да ги постави на пристапни локации пред соодветните знаменитости; 
• Апликација за мобилни уреди– туристички водич за Битола за лица со попречености;  
• Печатен туристички водичза Битола за слепи лица и лица со оштетен вид. 

Со овие алатки Битола повторно ќе биде прв град на Балканот (а и пошироко), овојпат како прв град со туристичка понуда за лицата со попреченост. 

На промоцијата ќе се обратат:

- Градоначалникот на Општина Битола - д-р Тони Коњановски, 

- Ректорот на Универзитетот „Св. Климент Охридски“, идеен творец и проектант на горенаведените алатки – проф. д-р Игор Неделковски, 

- Претседателот на МОБИЛНОСТ БИТОЛА – прим. д-р Нико Јанков, 

 - м-р Јове Парговски, изработувач на алатките и

- Весна Софронијевска, физиотерапевт и членка на Здружението на слепи лица - Битола, која ќе ја демонстрира употребата на алатките. 

Настанот е дел од проектот „Алтернативно туристичко искуство – Алтернативно патување“, кој МОБИЛНОСТ БИТОЛА го имплементира во рамките на ИПА Интеррег Програмата за прекугранична соработка „Грција – Република Северна Македонија 2014-2020“, и е ко-финансиран од Европската Унија и Националните фондови на земјите учеснички. Целта на проектот е да мотивира трансформација на една територија во инклузивна и пристапна туристичка дестинација, како и да го поддржи одржливиот развој на туризмот за природното и културното наследство во прекуграничниот регион. 

.

СВР Битола поднесе кривична пријава против В.Т.(74), Л.Н.(42), Ж.Н.П.(54) и Г.Т.(54), сите од Битола, поради постоење основи на сомнение за сторено кривично дело „неовластено производство и пуштање во промет, наркотични дроги, психотропни супстанци и прекурсори“. Од почетокот на јануари до средината на август, В.Т. како стечаен управник на правен субјект организирал и обезбедил услови на Л.Н., Ж.Н.П. и на Г.Т., кои биле вработени, да работат нелегално. Тие, иако знаеле дека поради констатитрани неправилности од Министерството за здравство му била одземена лиценцата за одгледување на растението канабис за медицински цели и отворената стечајна постапка за правниот субјект, продолжиле со производство во фабриката, соопштија од СВР Битола. 

Цевниот систем кој е стар колку и објектот на детската градинка „Колибри“, е главната причина поради која неодамна се појави проблем со системот за греење во оваа градинка, која е клон на детската градинка Естреја Овадија Мара, а во објектот простории користи и училиштето „Тодор Ангелевски“.

Градоначалникот Коњановски и стручните екипи од општината, денеска извршија увид во оваа детска градинка, каде со директорката Лидија Тфирст Митревска, разговараа за временото решение кое се спроведува во моментот, но и за можностите за заедничка заложба на општината и градинката за реализација на инвестицискиот проект, кој ќе овозможи трајно решавање на проблемот. За таа цел, Коњановски предложи, стручните служби од општината да овозможат техничка поддршка за подготовка на потребната документација, а раководството на градинката да ја спроведе постапката со што ќе се изврши замена на целата цевна мрежа.

Од страна на раководството на градинката, ваквиот предлог беше прифатен, а постапка се очекува да отпочне до крајот на месецот.

Коњановски нагласи дека, грижата за сите објекти, а посебно за објектите во кои се одвива воспитно – образовниот процес, мора да биде континуирана и во текот на целата година, со цел да се овозможат подобри услови и непречена работа на истите.

Апла.мк на 18 ноември пишуваше дека поради дефект без парно затоплување остана дел од објектот на градинката „Естреја Овадија Мара“ во населбата Стрелиште во Битола каде покрај клонот „Колибри“ со 120 деца, на вториот кат потстанар е подрачното училиште „Тодор Ангелевски“ со 60 ученици.