На подрачјето на општина Могила се запишани 5282 гласачи на 23 избирачки места. До 13 часот на гласање изглегле 18,57 проценти од гласачите. Според Славко Велевски, претседател на Општинската изборна комисија, гласањето течи без проблеми. Во оваа општина најоддалечени избирачки места се оние во селата Мојно и Трновци, на 24 километри од центaрот на општината.

Сите 169 избирачки места во општина Битола утрово на време беа отворени. Како што соопштија од Општинската изборна комисија, гласањето тече без проблем. Со право на глас се 81738 жители на општината. Годинава згаснува гласачкото место Злокуќани каде има само десет гласачи кои гласачкото право ќе можат да го остварат во село Бистрица. 

Патеките што водат до прочуениот Филмски мост во Зовиќ во заедничка еколошка акција од ѓубре ги исчистија ученици од Основното училиште „Тодор Ангелевски“ од четврто три одделение, предводени од наставничката Весна Гагаловска во соработка со месното население.

Битолчани денес имаа можност да купат Велигденска изработка по цена која самите ќе ја одредат од ракотворбите на членовите во Центарот за поддршка на лица со интелектуална попреченост „Порака“ од Битола. Ракотворбите ги изработија членовите на „Порака“, а собраните средства ќе се искористат за развој на Центарот.

Во Прилеп деновиве се одржа Регионална средба за песна музика и игра меѓу пензионерите од четири општини Битола, Прилеп, Демир Хисар и Крушево. На средбата присуствуваше и претседателката на Сојузот на пензионерите Станка Трајкова. Таа ја прогласи средбата за отворена, посакувајќи им на пензионерите добро здравје и што почето организирање на вакви манифестации на кои пензионерите можат да се дружат и забавуваат.

Маловишта, единственото село во границите на Националниот парк Пелистер, е прогласено за заштитена рурална споменична целина, соопшти Викторија Момева Алтипармаковска, етнолог конзерватор во НУ Завод и музеј Битола, по повод Денот на културното наследство што во фокусот ја имаше заштитата на руралниот предел.

Место неделно кафе на Широк Сокак, засукајте ракави и право в Касарна. Збирно место во 10 часот кај ресторан Аурум. Акцијата што ја иницираа професорката по англиски јазик Марија Магдалена Петковска Микаровска заедно со учениците од втора шест од Средното медицинско училиште, продолжува. Решени се да ја исчистат таканаречената елитна населба Златен рид од диви депонии и расфрлено ѓубре.  

11-годишната Маја Крстевска од Битола го освои првото место во категоријата Латино соло танци, настапувајќи cha-cha, rumba, jive и Juvenile 2 (пионери 2) во конкуренција од 14 девојки на Меѓународниот натпревар во латино, стандардни и модерни танци „Makedonia Open 2019“. Натпреварот се одржа на крајот од месец март во ВИП арената „Борис Трајковски“ во Скопје во организација на Танцовата спортска федерација на Македонија. Талентираната Крстевска беше дел од тимот на Танцовиот спортски клуб ,,Step up” (Степ ап) од Битола кој учествуваше со 49 натпреварувачи во повеќе категории и тоа : Latino solo (cha-cha, rumba, jive), Latino All ladies group, Latino All ladies formation, како и категоријата WDSF WORLD OPEN LATIN & STANDARD.

Еко центарот кој што работи под закрила на ЈП „Комуналец“ и со поддршка на Општина Битола, е носител на големиот настан кој што ќе се случи по повод Денот на планетата земја на 22 април. По серијата на презентации одржани во основните и средните училишта и во сите детски градинки во општината како дел од активностите на Еко центарот, ќе се случи првата заедничка оперативна координација на одбележувањето на овој ден. Директорот на ЈП „Комуналец“ Панде Богоевски, во присуство на градоначалничката на Општина Битола Наташа Петровска и директорите на образовните институции во градот, на координативната средба ги договорија конкретните чекори за локациите и начинот на делување на терен.

„Сите заедно во понеделник, во 12 часот заеднички ќе го одбележиме Денот на планетата земја и со тоа ќе направиме заеднички чекор кон подигнување на свеста и менталитетот кај нашите сограѓани, во однос на селектирањето на отпадот и истиот да не се фрла насекаде. На пет различни пунктови во градот, односно во Старата битолска чаршија, на Плоштадот Магнолија, кај хотелот Епинал, кај Офицерскиот дом и во Новиот пазар, ќе бидат лоцирани ученици од најблиските училишта кои што гравитираат околу локациите и заедно со нивните наставници, ќе делат флаери на кои е прикажан начинот на селектирање на отпадот и ќе им објаснуваат на минувачите како тоа да го прават. Исто така, свои претставници ќе имаат и невладините организации кои ќе им се приклучат на учениците на соодветните локации. Преку првичната селекција на отпадот, ние практично учествуваме во незагадување на нашата животна средина“, рече директорот на ЈП „Комуналец“ Панде Богоевски.