„Ги користиме можностите на смарт алатките и преку нив старата приказна на Битола ја претвораме во нејзино ново ткиво. Ќе почнеме со фотографии за Еврејските гробиштата и идејата е на гугл мапс да ги поставиме сите локции, места каде Евреите живееле или работеле. Така преку гугл мапс ќе може да се прошета низ еврејското минато на Битола. Понатаму, ќе се стават фотографии од 28 локации“, рече израелскиот амбасадор Дан Ориан.

Ова е само дел од низата настани со кои започнува одбележувањето на 76 годишнината од депортацијата на битолските Евреи. По тој повод во недела од Споменикот на депортацијата до Железничката станица ќе се одржи Маршот на животот, на кој ќе учсетвуваат видни гости од Израел. Воедно ќе се посетат и Еврејските гробишта каде ќе биде поставен сончевиот часовник што на Битола му го подарува Мати Грумберг, Евреин по потекло од Битола. 

Рахел Шели Леви Друмер, внуката на д-р Хаим Абраванел,по кого името го носи Здравствениот дом во Битола, веќе е дојдена во Битола и  најави дека на Маршот ќе присуствуваат потомци на многу поранешни битолски Евреи, како и професори од Израел. Воедно, еврејско семејство кое има битолско потекло, а е распрскано низ светот, планира во текот на годинава да допатува во Битола и тука да ја прослави куќаната слава.

„Нас, потомците на битолските Евреи, Битола ни е во срцето“, рече Леви Друмер.