Првата работилница се реализираше на 19 октомври во графичкиот кабинет на СОУ „Таки Даскало“. Во оваа работилница учествуваа ученици од втора година, профил графички техничари. Учениците-графичари напишаа пораки за книгата и технички ги подготвија за печатење на корици, класифицираа листови хартија и ги собраа во книжни блокови за истите, а на крај ги обрежаа на графички нож. На 20 октомври, во просториите на НУУБ „Св. Климент Охридски“, тефтерчињата беа доработени со техниките на шиење со жица и свиткување, а потоа повторно во графичкиот кабинет беа обрежани на графички нож.

Посетата на библиотеката беше посебно искуство за учениците-графичари бидејќи, покрај активностите од работилницата, тие имаа можност да се запознаат и со работата на секторите во библиотеката, да видат ретки примероци на книги, весници, списанија и други изданија, а доживување беше разгледувањето на графичките печатарски машини и рачната слагачница поставени во холот на библиотеката. Особено интересна беше и демонстрацијата на процесот на реставрација на книги од страна на библиотекарскиот помошник Јулијана Христовска-Кулевска од заштита и репрографија на книгата, инаку поранешна ученичка во оваа струка.

Работилниците се реализираа под менторство на библиотекар м-р Гордана Ѓоргиевска-Неделковски од секторот за популаризација на книгата и професорките по графички стручни предмети Весна Мундишевска-Велјановска и Катерина Спасовска-Маурдева.

За реализацијата на овие, но и на идни соработки, директорот на СОУ „Таки Даскало“ - Добре Босилковски и директорот на НУУБ „Св. Климент Охридски“ - Бојан Стефановски потпишаа меморандум за соработка.