17 годишниот битолчанец Петар Атанасовски го фати крстот што Митрополитот Петар го фрли во базенот во црквата Св. Димитрија во Битола. Атанасовски крстот успеа да го фати и во 2018 година кога имаше само 15 години. Со богојавленската церемонија чиноначалствуваше Митрополитот Петар, а голем број верници го следеа процесот на осветување на водите. .

Владиката Петар рече дека момчето што го фати крстот во Битола, утрото беше  присутно и на црковната служба, па ги повика и другите верници и оние кои скокаат по крстот да го прават истото, односно пред церемонијата на фрлање, да присуствуваат на богослужбата. 

„Имам 17 години и учам во Средното техничко училиште 'Ѓорги Наумов', трет пат скокам по крстот, а втор пат го фаќам. Многу сум среќен, чувството е неописливо, посакувам на сите здравје, среќа, љубов, мир.Очекувам оваа година да му биде посреќна и да ми се исполни една од моите желби. Инаку, одам често на богослужби, тоа ме исполнува и се надевам дека се повеќе и повеќе ќе доаѓаат на богослужби“, рече Атанасовски. 

 На крај упати поздрав до баирчани и навивачката група Чкембари.