Како ученик во гимназијата во Битола станал член на југословенската младинска комунистичка организација (СКОЈ) од 1941 г. Учествувал во многу акции на скоевците, а меѓу кои и во акции за растурање на летоци против окупаторската власт.

Како ученик во седми клас заминал во партизани и бил борец во првиот борбен строј на Битолско-преспанскиот партизански одред „Даме Груев“. Со овој одред учествувал во акцијата на 2 август во селото Смилево. На 22 октомври 1942 г. учествувал во партизанската акција во селото Сопотско, Ресенско.

Во 1942 г. станал член на Комунистичката партија на Југославија (КПЈ). Од ноември 1942 г. бил борец во Партизанскиот одред „Јане Сандански“, со кого учествувал во акцијата со која бил извршен напад врз железничката станица кај селата Српци и Беранци. Зимата 1942 и 1943 г. бил на партиска работа во Егејскиот дел на Македонија, а пролетта 1943 г. се вклучил во Партизанскиот одред „Вичо“ на грчката народноослободителна војска ЕЛАС. Заедно со тамошните македонски и грчки партизани учестувал во борбите против бугарските контрачети и грчките националистички и квинслишки воени формации во Леринско и Костурско.

Од мај 1943 г. се наоѓал во Битолскиот партизански одред „Гоце Делчев“, а од таму набрзо бил земен за курир на Главниот штаб на Народноослободителната војска и партизанскиоте одреди на Македонија (НОВ и ПОМ). Учествувал во завршните операции за ослободување на Македонија.

По војната завршил Правен факултет и во 1954 г. положил правосуден испит. Заземал високи општествени и политички функции, а од 1983 г. до пензионирањето во 1987 г. бил претседател на Општинскиот суд на здружен труд во Битола. Бил член на Претседателството на Сојузот на борците во Битола, претседател на Здружението на пензионери во Битола, а од април 2005 г. бил избран за претседател на Републичкиот одбор на Сојузот на борци на Македонија.

Бил носител на низа признанија, меѓу кои и Партизанска споменица 1941 и Орден за храброст.

Починал во Битола на 28 март 2014 г.

Подготвил: д-р Александар Литовски, историчар