Неговиот син Џелал Фејзула со сопругата Сузан, кои живеат во САД, пројавија интерес да ги предадат материјалите од студиото за да бидат зачувани во Архивот, како дел од грижата за фото-културата и нејзиното значење за современата локална историја на градот.

-Изразуваме особена благодарност до семејството Фејзула за нивната иницијатива проследена со историска и архивска свест за важноста на зачувувањето на материјалите важни за современата историја на Битола, фотографскиот еснаф и занаетчискиот живот во градот. Нека оваа иницијатива биде поттик со сите граѓани за зголемување на соработката помеѓу приватните иматели и нашата институција во однос на предавање на архивски материјал од историско и културно значење, наведуваат од Државниот архив одделение Битола

Краток историјат на Студио „Мис“:

Џеват Фејзула го изучувал фотографскиот занает во Белград и Загреб, од кадешто ја набавил својата фотографска и студио опрема. Во Битола бил чирак во фото-студиото „Искуство“ на фотографот Благој Стојчевски, на „Булевар 1 Мај“. Мајсторскиот испит го положил во Охрид.

Локацијата на неговото студио била во централното градско подрачје и три пати се менувала во текот на периодот 1961-1997, а последната локација била во реонот познат како „Дрвен пазар“. Интересен факт, особено важен за културолошките и мултиетничките аспекти на ова наследство е што Фејзула бил единствен фотограф од исламската заедница во Битола. Неговото фото-студио било за портрет фотографија; изработка на гимназиски матурски таблоа, а се занимавал и со рана монтажа, како и репродукција на стари фотографии – пејзажи и панорами на градот Битола и поважни културни објекти; најголем дел од фотографиите биле во црно-бела техника.