Земјоделците кои протестираа, ја окупираа управната зграда на грчкиот регион Западна Македонија во градот Кожани, јави АНА-МПА. Земјоделците не им дозволија на службениците да влезат. Доцна синоќа демонстрантите ја блокираа и царинската испостава во градот Касторија, северна Грција.

Земјоделците од Лерин одлучија да го затворат граничниот премин кон Македонија  Ники (Негочани) – Меџитлија за камиони кои превезуваат стока, од 12 до 15 часот попладне, објави Прототема.

Според информациите во грчките медиуми, пак, расположението кај земјоделците е против владините предлози со кои не се решаваат нивните проблеми. Се очекува земјоделците да одлучат да организираат голем протест со трактори во главниот град Атина, но се уште не е јасно дали таква одлука ќе биде донесена, дали ќе се случи за време на викендот или следната недела.

Земјоделците од источен Солун пак рано изутрината со трактори се собраа на плоштадот Епаноми да го изразат своето несогласување со мерките на грчката Влада.

Земјоделците, кои нешто пред 12 часот по локално време со десетици трактори тргнаа кон аеродромскиот центар во Солун, на мирен протест, потенцираат дека не биле задоволни од средбата што 15-члената комисија ја имала со грчкиот премиер и дека ќе продолжат со своите протести.

Извор https://www.slobodenpecat.mk/

Протест на грчките земјоделци/Фото: EPA-EFE/ACHILLEAS CHIRAS