Михалис Рокас, Шеф на Делегацијата на Европската Унија во Северна Македонија, утре (28 ноември 2024) ќе ја посети Битола.

Ова ќе биде прва од серијата општински посети преку кои граѓаните и институциите имаат можност да се запознаат со придобивките од процесот на пристапување во Европската Унија. Преку ваквите посети се истакнува важноста на интеграцијата и нејзиниот придонес во развојот на локалните заедници.

Амбасадорот Рокас во текот на посетата ќе се сретне со градоначалникот на Битола, Тони Коњановски. Шефот на ЕУ-делегацијата ќе разговара и со членовите на Советот на општината. Во рамки на своите активности, амбасадорот ќе има дискусии и со претставници на граѓанските организации, како и со младите, односно со дел од студентите на Универзитетот „Св. Климент Охридски“.