Во Јуроп Хаус Битола, на 29 јуни се отвори изложбата „Инспирации“, која преку внимателно избрани фотографии ги носи посетителите низ трите градови што ја носат титулата Европска престолнина на културата – Кемниц, Нова Горица и Горица.

Повеќе од четири децении, иницијативата „Европска престолнина на културата“ ја потврдува моќта на културата како двигател на урбаниот развој, европската соработка и заедничката иднина. Токму оваа идеја е во фокусот на изложбата, која преку фотографиите се раскажува приказната за креативност, соработка и трансформација на градовите. Изложбата потсетува дека културата има сила да ги обликува и местата и луѓето што живеат во нив.

На свеченото отворање присуствуваа Н.Е. Паоло Палминтери, амбасадор на Република Италија и г-ѓа Ника Ротар, заменик-шеф на Мисијата на Република Словенија. Во име на амбасадорката на Сојузна Република Германија, Петра Дрекслер, беа пренесени срдечни поздрави и искрени желби за успешно отворање на изложбата и пријатно уживање во поставката.

Со прогласувањето на изложбата „Инспирации“ за официјално отворена, посетителите добија можност да се запознаат со атмосферата, културната енергија и инспиративните приказни на трите европски престолнини на културата за 2025 година.

Изложбата, поставена во соработка со КИЦ - Битола, ќе биде отворена за посетителите до 5 јули, во просториите на Јуроп Хаус Битола (Офицерски дом).