Советниците на општина Битола се на шесто место во земјава по висината на просечниот месечен паушалот што го земале во 2019 година, покажа истражувањето на Центарот за граѓански комуникации. Според објавените табели, на прво место е градот Скопје со месечен надомест за советниците во 2019 година кој изнесува 24.276 денари. На второ место е Кичево со 19 610 денари месечен паушал. На трето Куманово со 17 649 денари, па Чаир со 17 184 денари и Врапчиште. Шестото место го дели Општина Битола со 11 други поголеми општини, како што се Велес, Прилеп, Струмица, Охрид, но и скопските Аеродром, КиселаВода, Карпош и други. Таму месечно на советниците им се исплаќал паушал од 16 993 денари.

Новаци е меѓу седумте општини кои имаат најмали месечни паушали за советниците, односно 9171 денар. Сепак, најнизок паушал имале советниците на Општина Вевчани во износ од 4.855 денари. Податоците се обезбедени преку барања за слободен пристап до информации од јавен карактер. 

Според Центраот за гражански комуникации, во 12 општини исплатувани се паушали кои се пониски од законски дозволениот максимум. Значително пониски паушали од дозволените се исплатувани во општините Вевчани, Липково, Василево, Студеничани и Зрновци. Кај следниве седум општини, паушалите се само за помалку од 10 % пониски од максималните: Делчево, Јегуновце, Новаци, Чешиново-Облешево, Арачиново, Ново Село и Конче. 

Спротивно, паушали повисоки од законскиот максимум има кај 15 општини. Од нив, кај 10 општини станува збор за мали разлики од 1 % до 4 % и можат да се објаснат дека се од техничка природа, но кај пет општини станува збор за износи на паушалите кои се поголеми од максимално дозволените за 11 % до 18 %. Станува збор за општините Пробиштип, Врапчиште, Кичево, Могила и Карбинци. 

Инаку, за да се исплати месечниот паушал на советниците, мора во месецот да биде одржана барем една седница на советот. А токму овде има и голема разноликост во однос на бројот на одржани седници на советите на општините. На врвот е Градот Скопје со одржани 27 седници годишно, а на дното се Сарај, Студеничани и Пласница со по 9 седници и Центар Жупа со само 6 седници, пишува во известувањето од Центраот за граѓански комуникации

Сведено според учинок, односно кога исплатените вкупни пари по советник ќе се стават во однос на одржаните седници, произлегува дека најплатени се советниците од Кичево, кои добиваат 18.102 денари по седница, а најмалку платени советниците во Вевчани по 4855 денари. Советниците во Град Скопје кои земаат месечно највисоки паушали, всушност добиваат по 10.789 денари по седница.

Податоците од ова истражување, како и од сите претходни, Центарот за граѓански комуникации ги става на располагање во отворен формат за да послужат како основа за натамошно користење и истражување од страна на новинарите, граѓанските организации, граѓаните, науката и сите други заинтересирани страни. Во крајна линија, целта е сите заедно да придонесеме за подобрување на квалитетот и условите за живот во земјава.

Извор: Центар за граѓански комуникации