Градоначалничката на Општина Битола, ја посети гимназијата „Јосип Броз Тито“ во Битола со цел да изврши увид во тековното работење на оваа образовна институција во процесот на изведување на он лајн наставата.

Раководството на гимназијата, односно директорката Фани Наумовска и заменик директорот Мите Ристов, ја информираа градоначалничката дека со средствата од Општина Битола, кои им беа доделени на училиштата пред почетокот на учебната година, набавиле 12 персонални компјутери, 3 лап топ компјутери и 5 таблети за цртање. Персоналните компјутери се опремени со звучници и камери, а таблетите за цртање се особено корисни и практични за изведување на настава по математика, физика и хемија.

Процесот на настава се изведува без проблеми, училиштето има одличен интернет, а организираноста на наставниот процес исто така е на многу високо ниво. Градоначалничката беше запозната и со преземените активности за одредени санации и реновирања во училиштето, како и за потребите за натамошно уредување во самите училници.

Низ училиштата во градот секојдневно пристигнува компјутерската техника која се набави со средства од Општина Битола за непречено да тече он-лајн наставата. Така во Гимназијата „Јосип Броз Тито“ пристигнаа 3 лап-топ компјутери, 12 деск-топ комјутери со камери и звучници и 5 таблети за цртање кои ќе се користат за решавање задачи, пишување формули, цртање на графици, дијаграми и слично, кои се неопходни за наставата по математика, физика и хемија.

„Со овие ИКТ уреди, значително ќе се подобри изведувањето на наставата на далечина, а со тоа ќе се овозможи успешна учебна година“, соопштија од Гимназијата.

Пред почетокот на оваа учебна година Општина Битола ја даде потребната поддршка до сите основни и средни училишта, со цел новиот модел на настава да се одвива без проблеми. Во основното образование беа вложени 5 502 400 денари за набавка на 203 компјутери, платен интернет за 12 месеци и 55 бесконтактни топломери Во средното образование пак, беa вложени 2 399 200 денари за набавка на 89 компјутери, исто така интернет за 12 месеци и 12 мерачи на температура. Вкупно издвоената сума за сите училишта е 7 901 600 денари или 128 481 евра.

Основното училиште „Коле Канински“ - Битола почна со спроведување онлајн настава и учење од дома кај учениците за време на принудниот распуст поради пандемијата на Ковид-19. Во онлајн едукацијата се вклучени сите наставници, и одделенските и предметните.

Зоран Мирчевски, директор на училиштето, вели дека иако наставниците и учениците се соочени со предизвици, сепак тие успешно се справуваат со ситуацијата. Како што вели тој, иако ова не е ништо слично како редовната настава, сепак учениците ќе имаат некаков ангажман додека седат дома.

- Наставниците од „Коле Канински“ неодамна почнаа со онлајн настава преку онлајн платформа и преку различни платформи за комуникација. На тој начин можеме да го продолжиме воспитно-образовниот процес за учениците - рече директорот Зоран Мирчевски.

Тој додава дека ваквиот вид на настава дава придобивки како што е континуитет во учењето и задржување на навиките за учење.

- Преку онлајн наставата ќе ги минимизираме последиците од прекинувањето на наставата поради Ковид-19. Им порачувам на сите ученици да се вклучат колку што можат повеќе во онлајн наставата затоа што ќе им донесе големи придобивки - вели директорот Мирчевски.