Малата и талентирана Ања Гроздановски (6) член на детскиот хор Ѕвончиња од школата на Марина Коруновска, синоќа со солистички настап заедно со Камерниот оркестар на Битола го отвори Божиќниот концерт. Шестгодишното девојче со раскошен талент ја испеа „Божиќна песна“ на композиторот Кире Костов, која за првпат се изведе на фестивалот Златно Славејче во 1993 година. Публиката со аплауз го проследи нејзиното појавување на сцената со диригентот на Камерниот оркестар Владимир Димовски, а по првите отпеани тактови, уште еднаш ја награди и охрабри со аплауз малата Ања.

Големата сала во Центарот за култура синоќа беше исполнета до последно место за Божиќниот концерт на битолскиот Камерен оркестар кој од неодамна е прогласен за национална установа.

Свој солистички настап имаа Наде Талевска и Агни Авшар, а со камерниот оркестар пееше и детскиот хор Ѕвончиња, кој настапи со песните „Тивка ноќ“, македонската и германската верзија, „Ѕвончиња“ (македонската верзија) и ја придружуваа Ања Гроздановски со „Божиќна песна“.

Хорот Коруновска Арс Нова настапи со песните „Feliz Navidad“, „Jingle Bell Rock“ и во придружба на солистките Марија Цветановска која ја пееше песната „All I Want For Christmas Is You“ и Емилија Ристевска со песната „Благослов“

Сите учесници на сцената на задоволство на публиката направија исклучителна атмосфера на самиот крај на концертот, кога диригентото Владимир Димовски засвири на виолина и го придружуваше хорот Коруновски Арс Нова додека уште еднаш ја пееше песната „Feliz Navidad“, а пак Марина Коруновска, ја анимиршае публиката од  диригентскиот подиум. Убава претпразнична атмосфера на Божиќниот концерт на Камерниот оркестар во Битола.