Масовен одзив на шаховскиот турнир на клубот „Штајниц“ во Битола

Дури седумдесет шахисти од Македонија и Грција зедоа учество на првиот брозпотезен шаховски турнир што го организираше новиот шаховски клуб „Штајниц“ од Битола. Кристалната или белата сала во Офицерскиот дом беше полна со вљубеници во шахот кои се натпреваруваа меѓу себе во шаховските вештини. Меѓу учесниците имаше деца од осум години, па до возрасни лица од околу седумесетина. На сите заедничка им беше љубовта кон шахот.

Претседателот на шаховскиот клуб „Штајниц“, Пеце Богдановски рече дека ќе се обидат да направат позитивна шаховска приказна во Битола, град кој има шаховска традиција, а главната цел им е да ги поттикнат младите да ја играат оваа спортска дисциплина.

„Овој брзопотезен шаховски турнир истовремено е и промоција на новиот битолски шаховски клуб Штајниц. Мотивот за отворање на шаховскиот клуб е работа со млади кадри. Во рамките на клубот имаме шаховска школа за да се совладаат тајните на шаховската игра од страна на млади и други заинтересирани шахисти. Преку систем на натпревари вложуваме труд уште повеќе да се усовршат во нивната игра“, рече Богдановски.

Богдановски додаде дека освен играта и натпреварувачкиот дух, присутна е дружбата на младите и повозрасни шахисти од државата и странство. 

„Посетеноста не изненади пријатно. Мислевме дека 40 натпреварувачи ќе имаме на турнирот. Но, се јавија заинтересирани од Грција, Скопје, Прилеп, Охрид, Струмица, Штип, па има 70 натпреварувачи. Тоа е масовен одзив на овој турнир што е позитивна работа. Се надеваме дека ова ќе им даде позитивна инспирација на што повеќе млади лица да почнат да се занимаваат со шах“, рече Богдановски.

Во клубот „Штајниц“ можат да членуваат деца од осум годишна возраст, па нагоре.

„Ние гледаме дека децата се оптопварени со училишни обврски, но тој што има вистинска љубов кон шахот, наоѓа време и за шаховската игра. Ако нема вакви клубови, нема кој да ги прифати тие таленти. Ние ќе им дадеме поттик да продолжат да се занимаваат со шах и понатаму“, рекоа од „Штајниц“.

На турнирот се играше брозопотезен шах по швајцарски систем од 9 кола со темпо на играње од 10 минути и 5 секунди додаток за секој одигран потег. Судеше меѓународен судија. 

За натпреварувачите беа подготвени пригодни подароци.           

Победници на турнирот се:

1.Тони Лазовски

2.Григориос Вардакас

3.Матеј Ѕвездаковски

4.Минас Јоанис