Фудбалот, или, најважната споредна работа на светот, по втор пат, во последните неколку месеци е во центарот на вниманието како на македонската фудбалска и спортска јавност, така и на фудбалската јавност во целиот свет. Ако пред некој месец имаше и дежурни скептици кои се обидуваа да го оспорат пласманот на Европското првенство, зборувајќи за Лигата на нации, и слабите противници, после оваа победа и тие останаа без зборови и мораа да честитаат.

Фудбалски 'малата' Македонија вчера ја победи големата Германија. Победен е четирикратниот светски  првак, трикратниот европски шампион, победена е земјата која го дава последниот европски клубски шампион, земјата чија домашна лига е меѓу петте најдобри во Европа, победени се играчите кои играат во Баерн Минхен, Манчестер Сити, Борусија, Ливерпул, Челзи и други европски гиганти.

ГАРИ ЛИНЕКЕР

Е познат поранешен англиски фудбалски репрезентативец од крајот на минатиот  век, со десетици настапи за англиската репрезентација и десетици постигнати голови. Исфрустриран што никако не можел да ја победи Германија ја изјавил легендарната реченица, која е се уште актуелна и се прераскажува во фудбалскиот свет. „Фудбалот е игра која ја играат 22-ца, а во која секогаш победуваат Германците“. Успеавме, барем за некој период, да ја преиначиме оваа изрека и последниот збор да го прекрстиме со  зборот Македонците.

Ниту еден успех, во ниедна област, а особено во спортот, не може да биде случаен и не доаѓа ако не  вложите многу труд, многу знаење, многу одрекување и многу желба да успеете. И овој успех ниту е случаен, ниту дојде преку ноќ. Вложено е многу работа за да се достигне ова. И поединечно и колективно. Шансите да одиме на Светско првенство се огромни, а ако тоа го направиме тоа ќе биде најголемиот спортски успех што сме го направиле од осамостојувањето.

ПОБЕДАТА

Факт е дека фудбалот, после вчерашната победа и изблиците на радост по социјалните мрежи, коментарите, вниманието по светските медиуми е спорт број еден во светот и во Македонија. Ниту еден друг спорт не може да ги привлече парите, медиумското внимание и публиката  кои се вртат во оваа игра.  И не постои ниту еден амбасадор, министер, претседател, премиер, ниту некој бизнисмен, професор, научник, музичар, кој вака може да ја претстави Македонија. Вчера цел свет не побара на картата и не запозна кои сме и каде сме.

Уште еднаш се потврди тезата, дека ако сме единствени, ние што живееме на овие простори, се здружиме, заеднички функционираме и се почитуваме, можеме да постигнеме многу. Енис  и Горан, Аријан и Елиф, Дарко, Висар и Стефан, ни покажаа колку се небитни некои работи, ако се сака државата и дресот со националниот грб. Тие се хероите на Македонија и тие го покажуваат патот каде треба да одиме.

Затоа треба да вложуваме во спортот и во спортската инфраструктура без размислување и без заддршка. Тоа е патот кој може да доведе до успех на сите.

П.С. Честитки и до нашите, до битолчаните Стефан и Кирче, кои имаа свој удел во победата, со надеж дека оваа бројка  во иднина само ќе се зголемува.

Пишува Валентин Груевски претседател на Советот на Општина Битола