Деновиве во изложбениот салон на ДЛУБ беше поставена изложбата на фотографии насловена „Блиски сеќавања“ на Вера Христовска, самостоен уметник. Изложбата беше дел од програмата за празнување на 4 Ноември, денот на ослободувањето на градот (80 години од ослободувањето на град Битола) и беше поддржана од Општина Битола. Нејзиното официјално отворање се случи на 2.11.2024г во 20ч во просториите на ДЛУБ и беше посетена од љубителите на уметноста, кои љубопитно низ разговори ги разгледуваа поставените серијали на фотографии. Изложбата беше поставена следните десет дена и посетувана од учениците на гимназијата СОУ „Јосип Броз-Тито“ заедно со нивниот професор по ликовна уметност Александар Поповски. Фотографиите поделени во 3 серии, беа поставени на 3 различни простори во галерискиот салон со опишан текст. На голема проѕирна табла беа поставени 3 равиени 35 милиметарски филмови кои датираат од 2006 година. Секоја од овие серии на фотографии, опфати дел од урбаниот амбиентален и културолошки дел на градот низ годините наназад. Моменти, кои се дел од нашите сеќавања, по природа далечни а по дух блиски.

Прикажани поврзувања на човекот со делови од градот и совпаѓање со амбиентот на самата архитектура. Првата серија на фотографии, прикажува делови од празнични приказни кои се поврзани со ликови од приватниот живот на авторката и се развиени аналогни фотографии од 2006 година. Другите две серии на фотографии, прикажуваат амбиентален и културолошки дел од градот во период од 2020-2024 година, прикажувајќи делови од архитектурата кои се подзаборавени или обновени и моменти од секојдневното темпо во градот преку street фотографии. Христовска, води свое сопствено фотографско студио “Умка Фотографика студио“ и работи во повеќе области од уметноста како фотографија, графички дизајн, колажи, видео.  Доживувајќи го животот низ различни перспективи и држејќи чекор со современата уметност, таа наоѓа нови начини да се изразува себеси уметнички преку експерименталната фотографија, дигитални колажи и други медиуми . Христовска имала неколку самостојни изложби во Македонија и учествувала на повеќе групни изложби низ европските земји. Нејзините дела се објавени во странски културни списанија и на веб-страници за култура. Од 2010 година, Вера работи како фотограф на ИФФК Браќа Манаки, дел како официјален фотограф на филмскиот фестивал и дел како соработник за 2 / 2 странска агенција. Дипломирала графички дизајн и мултимедија на Универзитетот Св.Климент Охридски, Графички факултет, во Македонија и студирала една година во странство на Универзитетот во Загреб, Факултетот за графички уметности, Хрватска. Христовска, има добиено повеќе награди за своите фотографии, меѓу кои и прва награда на интернационалниот фестивал за современа фотографија Rovinj Photodays Festival, (Хрватска), во категорија архитектура, жириран од Дејвид Бејт, професор и фотограф на Универзитетот во Вестминстер, Лондон, Велика Британија. Изложбата од овој фестивал беше поставена и во Загреб, во Музејот за уметности и занаети, каде истата останува во архивата на музејот. Во 2016 година, ја објави својата прва боенка “Македонски орнаменти“ за етно културата, како учесник на Скопје Креатива Фестивалот, а во 2017 година го објави буклетот “Разгледници од Македонија“, како учесник на Скопје Креатива Фестивалот