„Претставници на македонскиот дел на граничната Комисија за Сектор 3 и 4, заедно со претставници на грчките Министерства за внатрешни работи и за одбрана, на 24 ноември 2018 година, излегоа на терен и констатираа дека се изместени и оштетени гранични камења во должина од 12 километри. Инцидентот е потврден и од страна на Министерството за внатрешни работи на Република Македонија. Во тек е постапка за расчистување на случајот и обновување на оштетените гранични камења во согласност со Спогодбата за чување, одржување и обновување на граничните ознаки (копнени и пловни) и за предупредување, спречување и начин на испитување и решавање на граничните инциденти“, соопштија од МНР.

Инаку, од грчските медиуми соопштија дека грчката полиција започна истрага за да ги идентификува одговорните за повлекување на 105 гранични столбови на граничната линија меѓу Грција и Македонија. Столбовите се отстранети од нивните темели.

Некои од нив, пирамиди околу еден метар високи и некои помали цилиндри, наводно биле отстранети помеѓу четврток и петок, вдолж делот од 12 километри на границата меѓу селата Мезокампос и Ахлада во близина на градот на Лерин.