На настанот беше покането и здружението „Порака Нова“ од Струга, чии членови се лица со различни видови попречености, ученици и наставници од „Коле Канински“, и студенти од Славјанскиот Универзитет од Битола, а присутен беше и градоначалникот на Битола, Тони Коњановски заедно со неговиот заменик Бојан Бојковски. Градоначалникот го поздрави настанот истакнувајќи дека како лекар чувствува поголема одговорност за поголема инклузивност и поквалитетен живот на лицата со Даунов синдром и лицата со попреченост.

Присутните на настанот имаа облечено шарени чорапи со цел да им се даде поддршка на лицата со Даунов синдром, покажувајќи колку е важно да се прифати разликата помеѓу луѓето. Токму ваква порака директорката на „Коле Канински“испрати преку организирање на настан од ваков вид.

- Иницијативата со Игор се покажа добра. Успеавме на единствен начин да дадеме поддршка на лицата со Даунов синдром, со поддршка на градоначалникот. Она што го направивме вечерва не е настан за нив туку за сите нас, за да им покажеме на лицата со попреченост дека сме постојано со нив - изјави директорката Христовска додавајќи дека „Коле Канински“ веќе десетина години е инклузивно училиште кое дава поддршка и работи со лица со различни видови на попречености.

На настанот присутен беше и Игор од Радожда, кој е лице со Даунов синдром. Тој истакна дека во едно општество секој треба да помага секому за лицата со попреченост да можат да напредуваат и да бидат поинтегрирани во заедницата.

Како што најави директорката Христовска, активностите не завршуваат тука. Имено, утре, на Светскиот ден на лицата со Даунов синдром, наставниците по физичко образование при ОУ „Коле Канински“ во 9 часот организираат ревијална трка со велосипеди на која учество ќе земат учениците од осмо одделение, а во 12.00 часот во просториите на училиштето ќе се одржи свечена приредба во организација на наставниците и учениците од одделенска настава, со што достојно ќе се одбележи овој ден, под мотото: „Со нас, не за нас“.