Имам желба да дадеме се од себе во смисла на реформите, а во смисла на тоа дека ЕУ ќе најде и смогне сили да го стави проширувањето на својата приоритетна листа, истакна премиерот Димитар Ковачевски на Бледскиот стратешки форум.

-Уверен сум дека Северна Македонија покажа оти може да носи тешки и храбри одлуки и по секоја од нив излеговме како посилна земја и токму затоа во овој момент би рекол дека, во старата смисла од старите земји кандидатки, најдобри сме во многу аспекти во смисла на имлементирање на европското законодавство, микро финансиската стабилност, што е докажано од ЕУ и инструментите на ЕУ. Затоа велам дека 2030 е остварлива како цел, рече премиерот.

Претседателот на Европскиот Совет Шарл Мишел на отворањето на Бледскиот стратешки форум кој оваа година е посветена на тематата „Солидарност за глобална сигурност“ соопште дека Европската Унија си постави за цел до 2030 година да се прошири со нови членки.

Обраќајќи се на форумот на лидерите на земјите од Западен Балкан, Мишел истакна дека е време да се надминат сите меѓусоседски прашања и сите земји од регионот и ЕУ да се посветат на остварување на оваа цел – во 2030 мора да има ново проширување.

„Идните земји-членки се во различни фази на нивниот пат кон ЕУ. Но, треба да се погрижиме минатите конфликти да не се внесуваат во ЕУ и да се користат за блокирање на пристапот на нивните соседи и идните земји-членки“, потенцираше Мишел.

Според министерката за култура Бисера Костадиновска Стојчевска значењето на кодификаторите на македонскиот литературен јазик – Блаже Конески и Крсте Петков Мисирков – за македонскиот јазик е монументално.

-Ги поставија основите на современиот македонски јазичен идентитет. Како граѓанин, како професорка, како министерка, и како социјалдемократка, верувам во важноста на јазичната и културната различност како столб на социјалната правда и вклученост. Македонскиот јазик е жив! Се говорело македонски, се говори на македонски и ќе се говори на македонски без оглед дали тоа некому му одговара или не! Македонскиот јазик е културно одбележје на македонскиот народ. Македонскиот јазик се користи во образованието, во нашите институции и во секојдневниот живот. Неговиот статус не е предмет на дебата. Овозможени се подобри услови за заштита и унапредување на македонскиот јазик во јавната комуникација, вели министерката во интервју за трн.мк.

Претседателот на Владата на Република Северна Македонија, Димитар Ковачевски, во рамките на работната посета на Република Словенија по повод учеството на Бледскиот стратешки форум, оствари средби со претставници на здруженија и асоцијации на дијаспората од Северна Македонија во градот Копер.

На средбата беше истакната заложбата на Владата да негува врски со иселениците во Словенија со што придонесува за взаемно одржување на традицијата и културата што е заедничко за сите без разлика каде живеат. Соговорниците разменија мислења за важноста од воспоставување на добри бизнис практики како и развојни проекти меѓу Словенија и Северна Македонија.

Преспа попладнево беше зафатена од големо невреме со врнежи од град. Уште не се знае какви штети предизвика врз овошките. Градот ги побеле улиците и овоштарниците. Преспа и Ресен еден час немаа струја.