Делегација од германскиот град Бон во соработка со Општина Битола го разгледуваат идејниот проект на ЈП ,,Комуналец" за засадување на дендро парк во Битола. 

,,Дендро парк во кој ќе се засадат  дрвја што се успешни во регијата на Бон и Битола. Сето тоа би било пропратено со таблички и објаснувања за растенијата. Дури и локацијата е утврдена во главниот градски парк", рече директорот на ЈП ,,Комуналец" Панде Богоевски. 

„Секоја идеја е голема, затоа и од Битола се може(и)“, беше мотото на Демо денот што се одржа на деветти април во Битола кога несекојдневна можност имаа дваесетина млади луѓе да ги претстават своите иновативни бизнис планови пред потенцијални инвеститори. Ова беше официјалниот завршен настан на акцелераторската програма Employouth во организација на Фондацијата за одржлив развој „ПРЕДА Плус“.

Поставени се клупи и жардиниери на пешачката патека од Ленски мост до местото каде што беше некогашна „Хигиена“. Оваа урбана опрема им овозможува на минувачите да можат да седнат и да уживаат во старата чаршија. Само за жал, се уште има несовесни возачи кои со автомобили велгуваат во зоната и се паркираат иако тоа не е дозволено. .

По подолг период на планирање од страна на Кошаркарскиот клуб Петровски, се стигна до реализација на идејата за МУЛТИ-СПОРТ за најмладите во нашиот град.

Посветен на својата мисија за создавање на здрава младина, клубот створи оптимални услови за реализација на оваа проекција, набавувајќи опрема и реквизити за голем број спортови, кои ќе бидат опфатени во МУЛТИ-СПОРТ отсекот. Некои од направите се новитет во градот.

За јагленот тешко дека ќе има голема иднина во Европа, а со тоа и кај нас, зашто цената на емисиите на јаглероден диоксид ќе биде толку висока, што ваквото производство нема да биде конкурентно на пазарот на енергија, рече на предавањето на Техничкиот факултет во Битола академикот и енергетски експерт Глигор Каневче. Тој алармираше дека е последен момент да почне да се размислува за нови правци во развојот на македонскиот енергетски стожер РЕК ,,Битола”.

Во неделата екипи од Јавното претпријатие „Пазари“ исчистија четири тони хартија во облик на гајби, други отпадни хартиени материјали, пластика, стакло и друг смет оставени покрај тезгите.

Годинава се одбележуваат сто години од постоењето на Фудбалскиот клуб „Преспа“, единствениот фудбалскиот клуб кој што и покрај сите подеми и падови успеал непрекинато да опстои под истото име.

Овие сто години историја, од клубот велат дека се преплетени со многу спомени, генерации младинци, фудбалски ентузијасти и многу љубов кон ,,најважната споредна работа на светот„.

Претседателот на ВМРО-ДПМНЕ во Новаци Стевче Стевановски воедно е и претседател на Општинската изборна комисија во оваа општина, која е одговорна за законски спроведување на престојните претседателски избори.

Жители на пелагонската општина Новаци прашуваат дали Стевановски законски и морално може да ги извршува и двете функции без при тоа да не се повреди начелото на непристрасност.

„Лобира за еден од кандидатите за претседател, а е главен на ОИК“, велат жители од Новаци

Тие велат дека Стевановски во предизборието е активен во населените места и лобира за еден од кандидатите за претседател.

(Фото: Од предизборните активности за претседателските извори, на фотограгијата се и локалниот координатор Стевче Стевановски и претседателот на паријата ВМРО-ДПМНЕ. Фотографијата е од фб страницата на ВМРО-ДПМНЕ во Новаци) 

Стевче Стевановски, од 2015 година е вработен во Општина Новаци на работно место советник за легализација на земјоделско земјиште, а од 2016 година е избран за претседател на ОИК во Новаци. Додека пак, лидер на ВМРО-ДПМНЕ во Општина Новаци е од 2013 година.

Стевановски: „Тоа што сум претседател на Општинскиот комитет, нема врска со ОИК“

Стевановски за Апла.мк вели дека не гледа конфликт на интереси што во исто време е претседател на ОИК и претседател на ВМРО-ДПМНЕ во Општина Новаци.

-Досега како претседател на ОИК во Новаци сум поминал и парламентарни и локални избори и референдумот. Не сум имал никакви забелешки од ДИК за мојата работа. Законот е јасен, јас можам да ја напуштам позицијата на претседател на ОИК , само заради здравствени причини или патување во странство. А ако некој намислил да ме менува, тоа нема да се случи, зошто работам професионално и по закон. Ми останува уште една година од мојот мандат како претседатл на ОИК-Новаци и тоа значи дека останувам на оваа позиција. Тоа што јас сум претседател и на ВМРО-ДПМНЕ , тоа нема врска со моите активности, вели за Апла.мк Стевановски.

(Фото: Еден од митинзите на кои и Груевски говореше во Новаци, а на кој беше присутен и сегашниот претседател на ОИК ) 

Од ДИК велат случајно бил избран

Од ДИК за Апла.мк одговорија дека законот не предвидува судир на интереси од ваков вид кога претседател на ОИК е и претседател на политичка партија во едно населено место.

„Во случајот нема законски пречки. Во изборната администрација се избираат лица по случаен избор од редовите на државните службеници. Предвидено е во законот од кои органи не може да се членови во ОИК, но не за ваков случај“, рече портпаролот на ДИК, Љупка Гугучевска.

Таа вели дека досега не им било алармирано за друг ваков случај како во Новаци.

И други високи партиски функционери биле први луѓе на ОИК

Во другите општини во Пелагонија нема друг случај претседател на партиски огранок да е и претседател на Општинската изборна комисија. Но, сепак на чело на комисиите има и лица кои долго време биле партиски функционери на ВМРО-ДПМНЕ. Таков е примерот со Могила каде претседател на ОИК е Славко Велевски кој дури четири мандати беше градоначалник на Општината од редовите на ВМРО-ДПМНЕ.

Правниците гледаат конфликт од морален и етички аспект

Стручњаци од правната фела за Апла.мк велат дека со извршувањето на двете функции се доведува во прашање објективноста и непристрасноста.

-Од формален аспект можеби е во ред што лицето во исто време е претседател на ОИК и претседател на политичка партија во таа општина, но од морален и етички аспект тука би можело да има конфликт на интереси ако говориме со политички речник. Тоа е една слична ситуација кога еден судија се иззема од предметот заради тоа што е во роднинска или било каква друга врска со еден од странките во тој предмет. И самиот закон предвидува „други околности што би влијаеле на пристрасноста“. Некои закони треба да се ревидираат зошто вакви какви што се, отворено се доведува во прашање начелото на објективност при постапувањето за време на изборите од лицето Н.Н, вели долгогодишен битолски адвокат. 

Младински културен центар Битола веќе девет години е овластено здружение на граѓани за давање претходна правна помош. Деветгодишното постоење на канцеларијата за претходна правна помош овозможи кај граѓаните од општина Битола, како и поблиските општини (Новаци, Могила, Демир Хисар, Ресен и Кичево), препознатливост на МКЦ - Битола како место во кое истите се обраќаат и добиваат претходна правна помош во вид на општа правна информација, иницијален правен совет, како и помош при пополнување на барање за бесплатна правна помош.

Првенствена цел е едукација и заштита на законски загарантираните права, особено на социјално загрозените граѓани, како и обезбедување на претходна правна помош. Оваа година со изготвување на информативно видео, во соработка со останатите четири овластени здруженија од проектот „Пристап до правда во Македонија“, предвидено е поголема маса на граѓани да бидат информирани и запознати со новиот закон за бесплатна правна помош. Понатаму, преку одржување на четири едукативни сесии во општините Битола, Ресен и Кичево, како и преку одржување на директни средби со граѓаните од врата на врата предвидено е подигнување на јавната свест и степенот на нивна информираност од една страна, како и подобрување на нивните знаења за придобивките на законот од друга страна. Со цел утврдување на степенот на информираност на граѓаните со правата од постоечкиот закон за бесплатна правна помош предвидено е анкетирање на 120 граѓани селектирани според различни критериуми и изготвување на статистички преглед во поглед на возрасна граница, етничка припадност и степен на образование. Оваа анализа ни е од големо значење особено за поставување на идна насока за тоа кај кои категории на лица е потребна поголема ангажираност сè со цел нивно запознавање и информирање со правата и обврските од законот за бесплатна правна помош.

Во склоп на овогодинешните активности при одобрено барање за бесплатна правна помош предвидено е набљудување на постапки, како и обезбедување бесплатна правна помош на граѓаните чии барања се одбиени од страна на Министерство за правда.

Во процедура е донесување нов закон за бесплатна правна помош чија примена ќе започне од 01.10.2019 година. Новиот предлог закон предвидува можност за користење право на секундарна правна помош за секое лице кое има потреба од стручна правна помош од адвокат, за конкретна правна работа, кое не е во можност да ги плати трошоците на постапката заради неговата финансиска состојба, чие барање е оправдано и ги исполнува законски предвидените критериуми.

Во текот на 2018-та година од страна на МКЦ - Битола дадена е претходна правна помош на вкупно 162 граѓани. Врз основа на вака укажаната претходна правна помош поднесени се седум барања за бесплатна правна помош, од кои четири се одобрени, две се одбиени, а за едно барање постапката е запрена, по иницијатива на странката. Како резултат на одржаните едукативни сесии од страна на МКЦ - Битола едуцирани се вкупно 105 граѓани од општините Битола, Могила, Ресен и Кичево и истите се запознати со законот за бесплатна правна помош. Оваа година очекуваме бројот на услужени граѓани да биде зголемен. За таа цел апелираме до сите граѓани кои имаат правен проблем или познаваат некој кој има правен проблем, да се обратат во нашата канцеларија, на ул.„Цар Самоил“ бр.29, секој работен ден од 09:00 до 16:30 часот или на телефонските броеви 047 233-020 или 071 254 337 и да побараат претходна правна помош.

Во склоп на активностите планирани со проектот „Пристап до правда во Македонија“, кој што се реализира со финансиска поддршка од Фондација Отворено Општество - Македонија канцеларијата на МКЦ - Битола е отворена за сите граѓани во текот на 2019 година, стои во соопштението на МКЦ – Битола.