Во последните три недели се забележува стабилизирање на бројот на заболени лица од ковид-19, а во последната недела значително намалување  од 31 процент, пишува во Извештајот на Институтот за јавно здравје за период од 4 до 10 април годинава. Тестирани се вкупно 14.434 материјали со намалување од 3 проценти во однос на минатата недела. Регистрирани сe 1.106 нови позитивни случаи од 33 градови во државата, со намалување од 31отсто. Процентот на позитивност просечно изнесува 7,3%. Најголем дел од регистрираните случаи се од Скопје, а највисока неделна инциденца е регистрирана во Битола, Демир Капија  и Ресен. Во Битола денес новозаболени 23. Од појавата на пандемијата до денес 15027 позитивни случаи, од кои активни 153. 

Регистрирани се заболени лица во сите возрасни групи. Најзастапени над 60 години, а најмал број деца до 9 години  Во однос на претходната недела, се регистрира намалување кај сите возрасни групи особени кај лицата од  50-59 години. .

Во текот на минатата недела со статус „оздравени“ се стекнале 1.530 лица во хоспитализирани услови или на домашно лекување, 10,6% помалку во споредба со минатата недела. Пријавени се 175 реинфекции, со намалување од 36,1% и 10 смртни случаи во 4 градови за 23,1% помалку во однос на претходната недела. Најголем дел од нив се од Скопје (6). И натаму присутни се BA.1 и BA.2 сублиниите на Омикрон.

Заклучно со 10.04.2022, пријавени се вкупно 307.817 случаи со коронавирус. Најголем дел од заболените се регистрирани во Скопје, Куманово, Битола, Прилеп, Тетово и Кавадарци, а највисок морбидитет во Кавадарци и Скопје. Највисок морталитет во Прилеп, Кавадарци и Охрид, а  леталитет во Струга и Крива Паланка .

Регистрирано е намалување на инциденцата во последните две недели во 28 градови, со најголемо намалување во Дојран, Кратово, Демир Хисар, Богданци и Македонски Брод. Зголемување се забележува во Крушево, Пробиштип, Делчево, Свети Николе, Демир Капија, Битола и Ресен, додека состојбата останува непроменета во Македонска Каменица.

Според извештаите од болниците, моментално се хоспитализирани 63 лица (11,3% помалку во споредба со претходна недела), од нив 25 се на кислородна поддршка (7,4% помалку), нема пријавено лица на механичка вентилација, а претходна недела беа пријавени пет.

Според категоризацијата на ризикот и проценката на ситуацијата, Република Северна Македонија е во фаза на широка трансмисија, подниво 2, со соодветни капацитети за одговор.

ЈП „Водовод“ известува дека на ден 13.04.2022 (среда), поради промена на затворач и хидрант на ул."Петар Петровиќ Његош" (улицата на Ѕвончарите) со прекинато водоснабдување ќе бидат корисниците на ул. „Булевар 1 Мај" на потегот од зградата на "ЗОИЛ" до ул. "Никола Тесла" и потегот од ул. "Никола Тесла" до крајот на ул. "Петар Петровиќ Његош". Водоснабдувањето ќе биде прекинато од 09:00 часот до завршување со работните активности.

Исто така, поради замена на на водоводна мрежа на десната страна од горниот дел на улица „Солунска“ , односно од крстосницата со улица „Орде Чопела“ до крстосницата со улица „Тошо Даскало“, наредните денови ќе следи прекин на водоснабдувањето на објектите во тој дел.

На Третиот мастерс од вкупно предвидените седум од Првенството на Македонија во Американски пул билјард се играше 14 1 или во светот позната уште и како straight pool billiard. Турнирот за А дивизија или прва лига се одржа во Гран клуб Скопје на десети април. Се работи за најстарата игра од пул игрите која што како повторно да зема замав и се повеќе добива на популарност. Игра која навидум е лесна, но се работи за многу интересна и игра која бара и стрпливост и итрина и држење фокус на подолг период. Игра со многу замки и каде послабиот играч скоро и да нема шанси.

Како што е познато во А дивизијата битолчани настапија со четворица натпреварувачи од вкупно 16 кои се фиксни за оваа година. Последните четворица испаѓаат, а нашите играчи се во безбедна зона. Илче Трајковски го освои трет пад по ред 5 место исто како и младата битолска надеж Христо Василевски. Најуспешен беше Тино Бојаџиев освојувајќи го второто место и само ја потврдува високата класа која ја покажа на минатиот турнир кога сите почести беа за него. Особено беше фуриозен во полуфиналето кое го заврши скоро без грешка. Со освоените бодови е само 70 бода за водечкиот во Генерален пласман. Судии на сите турнири се битолчаните Горан Петровски Сајкал и Горан Думевски Панчо..

Советникот од Левица, Горан Велевски поднесе иницијатва да се достави барање до Јавното претпријатие за државни патишта за осветлување и поставуавње соодветна сигнализација во тунелот и мостот на регионалиот пат А3 во Битола. Тој истакна дека во неосветлениот тунел е збиралиште на животни кои се предизвикувачи на сообраќајни несреќи.

„Повеќе години нема интервенција на надлежните за заштита на граѓаните, односно осветлување на тунелот и патна сигнализација околу мостот над Битола. Сведоци сме на неколку тешки сообраќајни несреќи зашто овој дел не е осветлен и нема патна сигнализација. Тунелот повеќе години е живеалиште на животни односно коњи и кучиња во сопственост на ромското население и тие се моментални предизвикувачи на сообраќајни несреќи. Доколку се осветли соодветно овој тунел и се постави патна сигнализација значително ќе се намали ризикот од секаков вид на опасност предизвикан во следниот период. Ќе се зголеми видливоста и со патната сигнализација ќе се огранични брзината“, рече Велевски.

На деветти март годинава седумнаесетгодишна девојка беше тешко повредена откако возилото во кое патувала удрило во коњ и излетало од регионалниот пат А3 Битола-Прилеп. Сообраќајката се случила во близина на тунелот од обиколницата над Битола.

На дневен ред на денешната седница на Совет на Општина Битола поставене е точка за измени на програмата за поставување урбана опрема на јавни површини на микролокацијата фудбалски стадион пред Тумбе кафе.  

Точката гласи: „Одлука за измена на програмата за поставување на урбана опрема на јавни површини , член 1- се врши десетта измена на програмата за поставување урбана опрема на јавни површини на Општина Битола, точката 5 се брише –микролокацијата фудбалски стадион пред Тумбе кафе. Член два се задолжува општинската администрација на Општина Битола да ја спроведе оваа одлука и да преземе мерки за остранување на објектите поставени на микролокацијата“.

Точката на дневен ред ја предложи претседателката на Совет Габриела Илиевска. 

Изминатите денови се крена голема врева околу времениот објект поставен на јавна површина пред влезот на фудбалскиот стадион во Битола. Дел од граѓаните побараа истиот да се тргни, а сопственмикот на социјалните мрежи соопшти дека за поставувањето ги има сите потребни дозволи. 

На 09.04.2022 околу 15.30 часот во СВР Битола, В.А.(77) од Битола пријавила дека околу 15.30 часот во нејзина нива на ул.„Индустриска“ настанал пожар од отпушок од цигара кој го фрлила, но пожарот не успеала да го изгасне.

Од МВР соопштија дека пожарот се проширил на соседната фабрика (млекарница Идеал Шипка) а при обид да го изгасне пожарот, со повреди се здобил М.Ѓ.(29), вработен како обезбедување. Од екипа на Територијалната противпожарна единица Битола пожарот бил изгаснат. Увид извршила екипа од СВР Битола и се работи на расчистување на случајот, по што ќе следува поднесок.

Делегатите на Изборната конференција на СДСМ Битола едногласно ги изгласаа новите членови на Извршниот и Надзорниот одбор на партискиот огранок.

За членови на Извршниот одбор на СДСМ Битола избрани се :

Гордана Анастасова, дипломиран учител ;

Миле Велјановски, дипломиран економист ;

Виолета Дракалска, дипломиран правник ;

Елизабета Ивановска, специјалист интернист, субспецијалист пулмолог ;

Пеце Кондовски, магистер по маркетинг менаџмент ;

Андреј Лозановски, студент ;

Пеце Матевски, дипломиран машински инженер, магистер по менаџмент на човечки ресурси ;

Јадранка Павловска, дипломиран менаџер во биотехниката;

Елена Пејчиновска, апсолвент на Медицински факултет ;

Јосиф Петровски, доцент доктор на науки ;

Бенер Синаноски, магистер на правни науки ;

Елена Спасеновска, дипломиран биолог, магистер по менаџмент во образование ;

Вера Средовска, дипломиран правник ;

Андреј Стојановски, дипломиран стоматолог ;

Зоран Степановски, геолошко рударски техничар ;

Валентина Стојановска, дипломиран економист, магистер по човечки ресурси ;

Теодор Тодоровски, дипломиран економист – банкар и

Елена Шалевска, магистер по англиски јазик и книжевност.

За членови на Надзорниот одбор на СДСМ Битола избрани се :

Панде Атанасов, машински техничар – енергетичар ;

Рабие Бајрамовска, дипломиран правник ;

Јагода Грашеска Трајковски, дипломиран менаџер по царина и шпедиција ;

Ивона Трифунов, магистер по јавна администрација и

Борче Петковски, доктор по ветеринарна медицина.

Претседателот на СДСМ Битола, Драган Крајовски претставувајќи ги предлозите рече дека тие се резултат на бројните средби што се одржаа со сите месни организации на партијата во Битола, при што, запазени се сите постулати на СДСМ – еднаква застапеност на мажите и жените, 30 проценти од предложените членови се младинци, и секако припадници на различни етнички заедници.

“ Предложените членови се наши другари и другарки, истакнати партиски борци, заслужни за победи што сме ги извојувале и сигурен сум ќе ги извојуваме пак уште на првите следни избори. Ве повикувам со поддршката што вечерва ќе ја дадете за избор на новите членови на Извршниот и Надзорниот одбор, да започнеме да ја пишуваме новата страна во работењето на СДСМ Битола на која нема да има големи и мали букви, наслови и фусноти. Да бидеме сите едно, сите сме другари, сите сме СДСМ. Да го покажеме тоа и на дело”, рече Крајовски во обраќањето.

На Изборната конференција на СДСМ Битола покрај делегатите од Битола, присуствуваа и Бојан Маричиќ, секретар за меѓународна соработка на СДСМ и заменик на претседателот на Владата за европски прашања, Бисера Костадиновска Стојчевска, потпретседател на СДСМ и министерка за култура во Владата, Владимир Рендевски, заменик министер за здравство во Владата на Република Северна Македонија, како и членовите на Извршниот и Надзорниот одбор на Социјалдемократскиот сојуз на Македонија од Битола Васко Ковачевски, Емилија Костурски, Васко Колевски, Рула Чаламани и Виолета Џима.