Да се повлечат од дневниот ред на 4-та седница на Советот на Општина Битола, точките за разрешување и именување на членови на Управните и  Надзорните одбори во јавните претпријатија, училиштата и градинките во Битола, побара советничката од иницијативата „Поинаку“, Габриела Илиевска. Ова барање, според неа е затоа што процесот не е транспарентен, a списокот со имиња на лицата кои треба да бидат именувани, до советниците стигнале непосредно пред почетокот на денешната седница. Претседателот на Советот, Валентин Груевски, рече дека постапката за разрешување и именување на члeнови на одборите  ќе се реализира на денешната седница, со цел да се спречат игрите на актуелните директори во училиштата.

-Сметаме дека е нарушена транспарентноста и начинот на работа на Советот на Општина Битола, затоа што според статут и деловник, материјалите што ги добиваме ние како советници, треба да ги имаме 7 дена пред седница. Ние ги добивме 5 минути пред започнување на седницата. Јас како советник и во претходниот состав на Советот, за оваа работа гласав против, токму затоа што сме немале доволно информации за да одлучам како ќе гласам. Станува збор за именување на 150 лица за кои немаме податоци. Добив образложение дека ќе добиме доволно време за да ги разгледаме точките, па потоа ќе преминеме на гласање “, рече Илиевска.

- Целта е да ги спречиме директорите во училиштата кои во текот на денешниот ден свикуваат седници на Училишните одбори, сметајќи дека со тоа ќе си ги заштитат своите директорски места, со тоа што ќе изберат подобни наставници, на кои наводно им биле истечени мандатите. Таквите игри како Совет  нема да ги дозволиме и затоа сметаме дека овие точки на денешната седница мора да ги донесеме и да го спречиме она што во изминатиот период ВМРО-ДПМНЕ, го направи во училиштата-огромни долгови кои достигнуваат до 1,5 милиони евра, изјави Груевски.

Тој понуди пауза во текот на денешниот ден пред расправата по овие точки, за да можат советниците да заземат став околу именувањето на новите членови на одборите. Но, Илиевска, го одби ваквиот предлог, со образложение дека не бара време, туку транспарентност и промена на начинот на кој што во изминатите години  функционирал Советот на Општина Битола.

На расправата на втората сединца во Советот на општина Битола за формирање на комисисии, опозициската ВМРО-ДПМНЕ, се пожали дека е маргинализирана во составот на комисиите  кои за нив се значајни и бараат поголема застапеност. Од владеачкото мнозинсво велат дека испочитувана е пропорционалната застапеност на сите советнички групи во советот.

На денешната конститутивна седница, Валентин Груевски од ЛДП, беше избран за претседател на Советот на општина Битола. За негоа гласаа 17 советници од СДСМ и коалицијата, двајца независни советници од граѓанската иницијатива „Поинаку“ и 1 советник од коалицијата на ДУИ. Сите 11 советници од ВМРО-ДПМНЕ гласаа против.

-На сите избрани советници им честитам, а на ОИК-Битола и се заблагодарувам за спроведените демократски избори, а им благодарам и на граѓаните кои на 15 октомври, достоинствено и мирно излегоа на избирачките места и го дадоа својот глас онака како што мислеа дека треба да го дадат.