АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Претседателот на Република Северна Македонија, Стево Пендаровски, денеска се вклучи во е-наставата што се реализираше во училишта во Општина Могила.
Пендаровски имаше можност директно да го проследи образовниот процес, во услови кога поради епидемијата предизвикана од вирусот КОВИД-19, учениците наставата ја следат од своите домови.
-Во разговорот со учениците, претседателот укажа на важноста да бидат одговорни, да ги почитуваат препораките за да се заштитат себеси и своите најблиски. Тој посака што поскоро учениците да се вратат во училишните клупи меѓу своите другари, бидејќи и покрај неминовната интернет ера, учењето преку непосреден контакт е се уште најдобриот метод, наведуваат од кабинетот на претседателот Пандаровски.
На часот по француски јазик, во подрачното основно училиште „Кочо Рацин“ од с. Долно Српци, учениците зборуваа за своите омилени градови, додека учениците од истоименото централно основно училиште во с. Ивањевци, на часот по англиски јазик, со претседателот Пендаровски разговараа за различните видови храна.
Наставничките на двете одделенија Елизабета Дамева и Татјана Божиновска го информираа претседателот Пендаровски за придобивките, но и за предизвиците коишто произлегуваат од е-наставата, оценувајќи дека во овој момент, тоа е најдобриот начин непречено да се изучува предвидената материја. Во тој контекст, Пендаровски упати честитки за нивната посветеност во мотивирањето на учениците и од дома да бидат во потрага по нови знаења.
