Фрапантниот податок изнесен во постот нема научна основа и претставува само дел од пошироката кампања во која на големо се агитира да не се носат заштитни маски, кои пак, доколку се носат правилно и се комбинираат со други заштитни мерки помагаат да се спречи ширењето на коронавирусот. Тврдењето коешто се споделува на социјалните мрежи како да е несоборен факт, всушност е нечие лично мислење

Објава на социјалната мрежа „Фејсбук“ тврди дека носењето маски за заштита од пренесување на коронавирусот, кај децата предизвикале доцнење на развојот на говорот и дека ова се случува во над 350 отсто од случаите. На оваа објава ѝ недостига контекст и преставува манипулација.

Дали сте знаеле? Маските кај децата довеле до пораст на потешкотиите во развојот на говорот за неверојатни 350%, се вели во постот.

Иако во самата Фејсбук објава овој податок сензационалистички и ударно е објавен како да е 100 проценти точен, сепак во медиумскиот напис којшто е линкуван во истата објава се вели дека:

Нема истражување кое покажува дека маските предизвикуваат потешкотии во говорот и јазикот, но дефинитивно сум сигурен дека е фактор, вели Jaclyn Theek директор на клиника и логопед од Институтот за Говор и Учење во North Palm Beach, Флорида.

Меѓутоа,  ова тврдење коешто се споделува на социјалните мрежи како да е несоборлив факт, всушност, е нечие лично мислење и доживување.

Тврдењата произлегуваат од извештај објавен од The National Pulse, со наслов кој гласи: „ИЗВЕШТАЈ: Задолжителните маски предизвикуваат над 350% зголемување во доцнење на говорот во детството“. Но, на овој наслов му недостасува контекст.

Националните експерти за говор и детски развој во САД, коишто ги консултирале новинари од „Ројтерс“ велат дека сè уште нема конкретни докази за поддршка на тврдењата дека маските предизвикуваат доцнење во говорот и развојот кај децата.

Експертите од Американското здружение за говор-јазик-слух велат дека доказите досега сè уште не даваат јасен одговор.

Д-р Дајан Пол, докторка по клинички прашања во говорна патологија и директорка на Здружението, за „Ројтерс“ изјавила дека „Во моментов, нема докази дека употребата на маски за лице од страна на возрасните кога разговараат со деца го спречува или го одложува говорот и јазикот за време на типичниот развој кај мали деца“.

Тврдењата што кружат на социјалните мрежи немаат основа во истражувачкиот свет и непотребно ги алармира родителите и членовите на семејството во време кога маските спасуваат животи, вели таа.

Според експертите, без оглед на употребата на маска на некои деца ќе им треба подолго време за да ги достигнат говорните и јазичните пресвртници – а на некои можеби ќе им треба и стручна помош.

Психолози од Универзитетот во Мајами спровеле истражување во кое констатирале дека дури и со маски, децата „сè уште имаат корист од јазикот на кој се изложени“.

Студијата спроведена со деца од предучилишна возраст од страна на универзитетот, исто така, заклучила дека маските не го попречуваат јазичниот развој на малите деца. Студијата открила дека:

Нема промена во способноста на децата да учат и да продуцираат јазик без разлика дали учениците и нивните наставници носеле маски или не.

Истражувачите кои ја спровеле студијата пред и за време на пандемијата откриле „дека децата произведуваат посложени говорни звуци додека носеле маски отколку без нив“.

Од сето ова произлегува дека ваков фрапантен податок нема научна база и претставува само дел од пошироката кампања во која на големо се агитира да не се носат заштитни маски, кои пак, доколку се носат правилно и се комбинираат со други заштитни мерки помагаат да се спречи ширењето на коронавирусот.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар