Решен е проблемот на улицата „Васко Карангелевски“ кај ОУ „Елпида Караманди“ со нов пешачки премин и ново сообраќајно решение. На барање на три здруженија на граѓани и ОСБСП-Битола пред една и пол година беше  потпишана петиција од 6500 потписници за кампањата „Стоп сакам да поминам“, за регулирање на овој пешачки премин.  Денеска слика е поинаква, преминувањето побезбедно и за децата и за возрасните. 

-Пешачкиот премин сега е соодветно регулиран и безбеден за минување на пешаците во овој дел на градот, тргнувајќи кон ОУ „Елпида Караманди“ и Дневниот центар за деца со посебни  потреби. Сакам да им се заблагодарам на потписниците на петицијата. Во градот има дуруги 8 точки, локации кои треба да побудат интерес кај надлежните да ги регулираат пешачките премини, порача Мите Ристов, од Здружението „Геосфера“.   

Професорката Јасмина Талевска од ОСБСП-Битола им порача на надлежните да извршат времена прекатегоризација на уличната мрежа. 

-Апелирам до советниците да подразмислат и да изнајдат начин за времена промена на функционалната категоризација со што би можеле да добиеме подобри решенија од ова. Зошто велам подобри, затоа што во овој момент со основен сообраќаен проект ова беше за магистрална улица единственото можно решение, доколку улицата беше од понизок ранг ќе имавме други решенија. Тоа од една страна, а од друга страна  имаше решение пешачки премин со разделно острово. Ова решение на сите тие инстанци во Општината ќе им требаше многу повеќе време. Затоа проектантот   се одлучи за оваа решение како единствено можно за ваква категорија на улици, рече професорката Јасмина Талевска од ОСБСП-Битола.

Градоначалничката Наташа Петровска рече дека за новото сообраќајно решение се вложени 430 000 денари, на вибрациони ленти, воздушни перничиња, катадиоптри, што придонесува за поголема видливост на улицата. 

-За жал години наназад некој некого убедувал дека станува збор за магистрална улица и дека ништо не може да се направи, меѓутоа мотивирани од она што значи безбедност на нашите деца и граѓани направивме нешто што може да ја подобри безбедноста на сообраќајот при движење учениците и граѓаните во овој дел на Битола. Останува  детектираните критички точки да ги средиме во наредниот период за другите делови од градот. Се можи да се направи и ништо не е дадено  еднаш за секогаш, рече Петровска.

А.Б

Жителите од улицата „13 Јули“ во Битола конечено ќе газат по асфалт. По поставувањеот на мешовитата канализација од страна на KЈП „Нискоградба“, во вредност од 813.828 денари, Општина Битола продолжува со санација и подготовки за асфалтирање и поставување на тротоари на ул. „13 Јули“. Градоначалничката на Општина Битола, во присуство на голем број локални жители, истакна дека конечно граѓаните од овој дел ќе добијат асфалт.

„Деновиве продолжуваме со уредување на коловозот, тротоарско решение и дел од паркингот околу овие згради. Висината на сумата на сегашните инфраструктурни зафати е над 4,7 милиони денари, што значи дека вкупно, со претходно вложеното во канализацијата ќе биде над 5,5 милиони денари. Сакам да нагласам дека овој потег е една заостаната состојба од минатото на нерешена инфраструктура и покрај тоа што биле платени комуналии и воедно била должна општината да го среди овој простор. За жал, во градот имаме низа вакви ситуации, но како сегашна локална самоуправа покажуваме одговорност во решавање на сите овие проблеми“, рече градоначалничката на Општина Битола Наташа Петровска.

Следна фаза на реализација во оваа улица ќе би де поставување на улично осветлување, како и осветлување на паркинг просторот околу зградите.

Се асфалтираат улици во Долно Оризари. Општина Битола  објави дека станува збор за вкупна должина од  1 километар во вредност од 5,5 милиони денари.

-1 километар нов асфалт на калливите улици во Долно Оризари, вредност 5,5 милиони денари, велат од општината. 

Пет улици во населеното место Долно Оризари, за прв пат добиваат асфалт, со што калливите улици, стануваат минато за жителите на оваа населба.

Со средства од Општина Битола, најпрво беа променети водоводните приклучоци кон градската водоводна мрежа, по што следуваше тампонирање на улиците и асфалтирање во должнина од еден километар. Покрај овие пет улици, наскоро се очекува да отпочне изградба на уште две улици, со помош на Пелагонискиот плански регион.