Годинава концептот е изменет со тоа што нема да има свечено отворање и затворање, а во следните два месеца ќе има 58 настани. Селекцијата ја направи комисија составена од експерти. При селекцијата, како што беше кажано на пресот, се внимавало да се изберат настани за сите вкусови, да се поддржат манифестации кои имаат долгогодишна традиција или имаат дефиниран имиџ на препознатливост од понова датум.

Во програмата се вклучени „Битола Шекспир фестивалот“, „Битола отворен град“, детска работилница на познатата креативна наставничка Весела Богдановиќ, „Рок Симфонија“ на Камерниот оркестар на која ќе гостува и Дадо Топиќ, „Локум фест“, „Илинденски денови“, „Незаворав“ , „Битола во бело“ до познати ди џеи и друго. Воедно и амбасадите ќе учествуваат со нивна понуда на културни настани што ќе го потврди карактерот на Битола на конзулски град.

Новата локална власт не го промена името на „Бит Фест“ како што тоа го направи екс градоначалникот пред 12 години кога дотогашното културно лето што го организираа неговите претходници не се зеде во предвид и од одбројувањето започна со „Бит Фест“.

„Не сакам со моето доаѓање да бидат направени такви резови кои нема да отворат простор за правење на стандради, туку ќе отворат простор да целокупно мислата биде насочена кон лечење на некакви суети, реваншизам , форсирање на некои политики “, рече Петровска.

Годинава на програмата не пишува дека покровител е градоначалник на општина Битола зашто според Петровска, покровителство имате тогаш кога располагате со средстава кои се под директна надлежност на градоначалникот.

„Ова се средства од буџетот, од граѓаните и не би сакала да биде популистички форсирано и понатаму да стои само името на градоначалникот“, рече Петровска.

Таа за идната година најави промена на концептот велејќи дека Битола ќе биде град на културата 365 дена во годината.