Го скршивме малерот! Штом ова го поминавме 13. издание сега можеме да тераме до стотка. Ама Панде вели дека има уште многу работи кои чекаат да го видат своето светло и да бидат извлечени од незаборавот. А колку материјали за нив има, во својата архива, ако му ја запленат од СЈО ќе тераат уште пет мандати- вака на шега кажа нараторката Силвана Петрова –Насух на 13. издание на фестивалот Незаборав кој вечерва се одржа во Центарот за култура во Битола. Организаторот на манифестацијата и автор на проектот „Незаборав“ кој ја величи битолската музичка традиција, Панде Димитровски, ова издание го посвети на забавните мелодии со фолк мотиви од Интерфест 1992-1996.

Хитовите како „Мојот вечен град Битола“, „Очи“, „Господе, дај ми сила“ „Засвири нешто од Битлси“, „Матурска вечера“, „Простено ти е“, „Плачат за нас и планините“ , „Не ни било судено“ и други песни што некогаш ги изведоа Емилија Сарафска, Билјана Дамјановска, Тања Кочовска, Љупчо Спасеноски, Гоце Николовски, Перо Христов, Росана, Наум Петревски и други изведувачи беа оживеани на сцена што предизвика аплаузи кај публиката жедна за убава и квалитетна македонска песна. На сцена со своите препознатливи гласови и изведби песните ги донесоа Дона Петровска, Бојан Стојков, Боеми, Билјана Дамјановска и други. Изненадување на вечерта беа таткото и ќерката Игор и Ангела Илиевски кои ја испеаја песната „Има една судбина“ од Тоде Новачевски што во 1992 година на Интерфест ја испеаја Росана и Наум.

Изведувачите беа придружени од бендот „Гром“ и одличните вокалистки Билјана и Лилјана Трајковски.

Интерфест остави длабок траг врз битолската музичка сцена. Тоа беше фестивал каде со своите креативни творби до израз дојдоа битолчаните Валентин Соклевски со „Очи“, „Свири стара тамбуро“ и други песни, Петар Ѓеоргиев- Калица со „Засвири нешто од Битлси“ , Спировски Салве-Слав како и други автори и композитори. Некои музички креативци денес не се присутни меѓу нас, но оставиле свој печат врз Интерфест и беа спомнати од сцената Милко Лозановски, Тоде Новачевски, Пеце Митревски-Митрата, Благој Петровски- Штука, Миле Шерденков, Михајло Бандевски, Драган Каранфиловски-Бојс, Гоце Димитровски и други.

„Во периодот од пет години на Интерфест од 40 реномирани автори кои се претставија, дури 25 беа битолчани“, вели Димитровски.

Годинава „Незаборав“ се одржа во рамки на „БИТ- ФЕСТ“, со поддршка на Општина Битола, а Комисијаста за култура манифестација ја стави на листата на традиционални со посебен интерес за градот.