АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
На големиот македонски празник „11 Октомври“, во градот на клавирите свечено беше затворен 33-от фестивал на класична музика „Интерфест“ -Битола.
Во блескавата палата на Офицерскиот дом, музиката на еден од најголемите гениј на човештвото, Волфганг Амадеус Моцарт, ја сплоти битолската публика во заеднички чувства на трогнатост, восхит, радост, убавина. Врвната изведба на реномираниот француски пијанист Бертран Жиро, диригентот Владимир Димовски и Камерниот оркестар на Битола, ја доловија магијата на Симфонијата бр.23 и Концертот за пијано бр. 17. Оваа безвремена музика 250 години наназад, на бројни генерации им ги буди најблагородните емоции и духовна возвишеност.
Свечената сала на Офицерски дом беше претесна за сите кои сакаа да ја доживеат радоста на последната вечер од незаборавните 11 претходни фестивалски настани.
Благодарение на ентузијазмот и работата на брачниот пар Милица Шперовиќ Рибарски и Кирил Рибарски, поддршката од Министерството за култура, Општина Битола, донаторот госпоѓа Фанија Мемца и Бутикот „Ермитаж“ Битола, персоналот на ЈОУ КИЦ и на Народен театар Битола, како и екипата ликовни уметници и дизајн од „Интерфест“, фестивалот се одржа со голем успех.
фото- Ивона Кочов
