Талески на Петровска и го додели клучот при примопредавањето на кабинетот признајавќи дека ова е историски момент за Битола зашто првпат на нејзино чело застанува жена која доби убедливо многу гласови, над 31 000 што не се случило на ниедно гласање во Битола до сега. На заминување изрази надеж дека таа ќе ги доврши проектите што претходната власт ги започна и ќе реализира нови, притоа истканувајќи дека многу е важна поддршката од централната власт за кое рече, дека оди многу тешко зашто живееме во мала држава со не многу големи ресурси.

Петровска на денешното обраќање пред новинароте во градоначалничкиот кабинет, а подоцна и од советничката говорница порача дека нема дилема оти цела своја желба, енергија и ентузијазам ќе ги вложи во развојот на Битола.

-Да се биде градоначалник е пред се одговорност, а дури потоа привилегија. Битола на многу полиња треба да доживее напредок, развој, просперитет. На граѓаните не им е важна политичката припадност, важно им е да им се обезбедат подобри услови за живот. Политичарот не е функција за себе туку во служба на граѓаните. Без да ја изврши таа улога, политичарот е никој и ништо- рече Петровска.

За општината вети дека ќе биде отворена, транспарентна, услужна за сите. За вработените во општината администрација порача дека единствена мерка ќе бидат  професионализмот, посветеноста во работата и стручноста. На советниците им порача „бидете истрајни во борбата за поубава Битола, вистински двигатели на развојот на Битола со  аналитички дискусии кои ќе видат до вистински решенија“.

Во нејзините раце не останува само клучот од објектот, туку и клучот од развојот на Битола. Во следниот период ќе има многу работа зашто Битола ја наследи со училишта со блокирани сметки, недоградени спортски објекти, река која од загаденост стана колекторски ситем, неурбанизирана ромска населба, нечист воздух, нереализирана топлификација, непостоење на покриен базен... Листата е долга, на потег е првапат жена градоначалник на Битола.