Гледката е волшебна зашто од едната страна е Преспанското Езеро, а од другата страна Баба Планина на врвовите со снег. Ова место е и воздушна бања посебно во овој период кога овоштарите не почнале со прескање на јаболкниците. До пред три години меѓу овие дестинации можеше да се патува само во возило. Потоа патеката беше ставена во употреба, па бројот на шетачи постепено се повеќе и повеќе се зголемува.

Дел од патеката, поплочена со бекатон коцки, е наменета за пешаци, а асфалтираниот дел за велосипедисти. Поставени се клупи за оние кои сакаат да одморат и да уживаат во погледот кон Преспанското Езеро. Всушност, самата патека е оддалечена на околу 200 метри од езерото. Поставени се и современи поцинкувани канделабри по должина на патеката, но во вечерните часови нема осветлување.

Дел од посетителите велат дека во иднина ќе треба околу да се засадат дрвја за да прават сенка. Така туристите ќе можат да шетаат и преку ден на лето кога е топло.  

Она што сите ги привлекува е убавината на Преспа, свежата клима, прекрасните зајдисонца, чистиот воздух. Ваквата убавина само во последните две години привлече над 15 бизнисмени, поранешни директори и познати македонски професори од Скопје да купат вили во Претор и таму да уживаат преку летото или да ги минат пензионерските денови. Со пешачката патека, скокна цената на плацевите што се продаваат во нејзина близина, а во изминатите години тешко се наоѓаа купувачи.