Техничкиот премиер на Владата на Р.С.Македонија,  Оливер Спасовски денеска ќе побара од Собранието на Р.С.Македонија да прогласи вонредна состојба во траење од 30 дена, со цел превенција и заштита на здравјето на граѓаните. Спасовски рече дека ситуацијата е вонредна поради корона вирусот и потребно е да се прогласи вонредна состојба која е предвидена со Уставот на Р.С.Македонија.

-Ова е една од најтешките одлуки на Владата, но е нужна и е многу важна пред се од аспект на економија и на јавното здравје, рече Спасовски, апелирајќи до граѓаните да се придржуваат во мерките што се  подразбираат во ваква состојба. 

-Прогласување на вонредна состојба не значи ограничување на слободното движење на граѓаните, туку поголеми овластувања на државата за справување со пандемијата со вирусот корона, на Владата ќе ѝ даде поефикасни средства за спас на економијата и борба со заразата“, рече Спасовски, и додаде  дека за Владата ова била најтешка одлука, која за првпат се бара да се прогласи во нашата држава.

-Вонредната ситуација пред која сме исправени со ситуацијата со коронавирусот, наложува и вонредни мерки. На денешната седница предложивме воведување вонредна ситуација на територијата на целата држава. Мерките ќе ги радикализираме, за да спречи уште поголем пик на болеста, кој е во најава. Одлучивме да му предложиме на Собранието да се свика и да ја донесе оваа одлука. Но, тоа е распуштено. Има уставна можност претседателот на Република Северна Македонија тоа да го стори и да прогласи вонредна состојба во траење од 30 дена“, рече Спасовски. 

На прес конференција во 14 часот се очекува да се обрати претседателот на Р.С.Македонија Стево Пендаровски.