Роскошната линија на битолската архитектура блесна низ фотографиите на битолскиот снимател и фотограф Златко Јосифовски. Тој во вечерно време успеа да ја долови магијата на битолските стари градби, од Градскиот часовник до поранешните конзулати, градски куќи, па се до денешниот лик испреплетен со водотеците на Драгор. Фотографиите ја покажуваат безвремената димензија на Битола која трае низ вековите и до денес ни влева гордост што газиме низ нејзините улици и градби. Се воодушевуваме на нејзината убавина и се обидуваме со нашите дела да оставиме печат во нејзините пулсирања, да се вградиме во нејзиното постоење иако знаеме дека нашата трага во однос на нејзината вечност не е ни колку линија или коцка на Саат Кулата. Сепак, заедно со Битола продолжуваме да чекориме кон вечноста.