Традиционално, Амбасадата на Руската Федерација во  Македонија, го одбележе Денот на руската дипломатија во Битола. По тој повод амбасадорот на Русија Олег Шчербак, со претставници од локалната самоуправа и други делегации положија цвеќе на споменикот „Руски крст“ кај градското шеталиште, што е подигнат  во чест на рускиот императорски конзул Александар Ростковски, кој бил убиен во Битола пред 115 години кога ја извршувал својата дипломатска должност во Македонија.

-За време на 6 векови постоење на руската дипломатија ние секогаш ги негуваме сеќавањата за луѓето кои дадоа придонес за развој на руската дипломатија, а особено го негуваме сеќавањата за луѓето кои загинаа исполнувајќи го својот професионален долг. Меѓу таквите истакнати дипломати беше и  Александар Ростковски чиј споменик е подигнат овде во Битола.  Професионалниот  и човечкиот подвиг на Ростковски е дел од нашата заедничка историја, рече меѓудругото Олег Шчербак, амбасадор на Руската Федерација во Македонија на одбележувањето на Денот на руската дипломатија, денеска во Битола. 

Битолчани  ќе може да чуваат повеќе од две кучиња во едно домаќинство. Уставниот суд, по иницијативата поднесена од Здружението за заштита на животните „Анима мунди“, го укина членот 106 од Одлуката за комунален ред на Општина Битола, донесена од Советот  во 2012 година, со која беше предвидено во едно семејно домаќинство да може да се чуваат до две кучиња. 

Обиколницата над  Битола, која е дел од магистралниот пат Охрид-Битола-Прилеп и натаму не е во функција поради  ново свлечиште, кое се појави, додека се санираше стариот одрон од ридот. Иако беше најавено дека привремено решение ќе биде поставување на семафори, со кои сообраќајот би се одвивал  наизменично, по една коловозна лента, со цел тешките товарни возила да не транзитираат низ градот и доплнително да го загадуваат воздухот, сепак, ваквото решение со појавата на новото свлечиште не можеше да се реализра. Од   јавното претпријатие за државни патишта, велат  дека заради безбедност на возачите и минувачите, полицијата и изведувачот одлучиле обиколницата да не се отвора за сообраќај.

Полицијата поднесе кривична пријава против А.В. (17) и Ѓ.Д. (18), двајцата од Битола, поради постоење основи на сомнение за сторено кривично дело „расна и друга дискриминација“. На 18.01.2018 година околу 02.30 часот на фасада од зграда на  Широк сокак во Битола пријавените испишале графит со недолична содржина на македонски и албански јазик. Секторот за внатрешни работи Битола, Одделението за Криминалистичка полиција, по превземени мерки и активности, го расветли настанот и ги откри сторителите.

Графитот на фасадата на зграда на Широк сокак  во Битола – „Смрт за шиптари“, напишан на македонски и на албански јазик,е и  со додавката „Закон си е закон“ алудирајќи на Законот за употреба на јазиците.

За утре во Битола е најавен  настан за размена на мислења и подигнување на свеста за мигрантите и бегалците  како  проект  на УСАИД.  Настанот „Кафе со бегалците и мигрантите” ќе се одржи во кафулето Интермецо со почеток во 11 часот.

На овој настан според најавата присутните ќе имаат можност да погледнат  емотивно видео во кое неколку баратели на азил во Република Македонија ги споделуваат нивните искуствa, по што ќе се отвори простор за разговори во кои секој присутен ќе има можност да ги сподели своите ставови, мислења или стравови за бегалците, мигрантите и бегалската криза.

Целта на овој настан е да се подигне свесноста за искуствата со кои се соочуваaт овие лица за време на нивното патување, меѓу кои и потенцијалната опасност да станат жртви на трговија со луѓе, како и да се намали жигосувањето на оваа група на граѓани.

Овој  прокет се спроведува  од страна на Македонско здружение на млади правници во соработка со Здружението на граѓани за акција против насилство и трговија со луѓе Отворена Порта.