Дваесет извонредни ликовни дела на македонскиот академски сликар Васко Ташковски, кого многумина го нарекуваат и македонскиот Дали, изложени се во Библиотеката во Гимназијата „Јосип Броз –Тито“ во Битола каде овој врвен уметник учел и ги направил почетоците во уметноста посебно во работењето со акварел. Ташковски учел основно училиште во објектот каде денес е сместена Гимназијата, во четириесетите години од минатиот век. Денес во училиштето има јазично-уметнички смер, па покрај гостите и учениците можеа да се запознаат со делото на академикот кој изложувал низ целиот свет, од Битола, па се до зградата на Обединетите нации во Њујорк.

Директорката на Гимназијата Лидија Споа рече дека овој настан дава сила учениците самоуверено и храбро да ги откриваат тајните на уметноста уште од средношколските клупи.

„Во годината кога Гимназијата ‘Јосип Броз Тито’ одбележува 130 години од нејзиното постоење како воспитно-образовна институција висока привилегија е да биде домаќин на еден исклучителен ликовен уметник. Горната гимназија е средношколска институција каде за првпат во слободна Македонија во 1945 година започна да се одржува настава на литературан македонски јазик. Токму овде, во овие училници, извесен дел до своето школување, во четириесеттите години на минатиот век го реализира и нашиот прославен ликовен уметник“, рече Споа.

Иницијатор на изложбата е библиотекарот Драган Ристевски, кој и претходно организирал слични културни настави во училишната Библиотека. Неговиот дедо, односно таткото на сопругата, Ранко Струмениковски бил колега, пријател и цимер на Ташковски. 

„По оваа несекојдневна изложба, за кусо време, одам во редовна заслужна пензија. Голема чест и задоволство е на овој начин да се заокружи мојот речиси 12 годишен библиотекарски ангажман. Во тој контакст е и оваа уметничка поставка на графики и акварели на Ташковски, на неговите волшебни дела што зрачат со ретка енергија, кои восхитуваат, никого не оставаат рамнодушен, но и опоменуваат за сите негативности на човекот врз мајката природа“, рече Ристевски.

Едно од делата ќе биде подарено на Гимназијата домаќин.  

„Во своето речеиси седумдецениско продуктивно ликовно творештво создал над 1000 слики во маслена техника, претежно работени на платна, околу 3000 акварели, над 1300 цртежи со молив, туш и комбинирани техники, а во негова сопственост се зачувани над 10 000 скици студии за слики и графики. Во своето 25 годишно работење во МРТ реализирал над 300 сценографии за различни телевизиски емисии, фестивали, драми… Неговиот потпис се нао]а и на голем број графички дизајнирани плакати, амблеми, илустрации, корици за книги , како и други графички решнија. Има над 50 самостојни изложби низ целиот свет, а во 2000 година во Њујорк во зградата на Обединетите нации е изложена неговата монументална слика ‘Пријател на мирот’“, рече градоначалникот Тони Коњановски кој ја отвори изложбата.

За жал Ташковски, кој е жива сликарска легенда и твори во неговата деветта деценија од животот не присуствуваше зашто денес се одбележуваат 55 години постоење на МАНУ, па на присустните им се обрати преку видео повик евоцирајќи спомени за неговото творење додека бил ученик .