Еленот Самак кој му дал инспирација доаѓа од американските простори, каде ги преживеал фазите на неоколонијализмот, високиот степен на индустријализација и опстоил до денешно време. Средбата со него, Стефановски ја имал летово за време на  престојот  во САД, на место каде што елените и срните слободно шетале во дворовите на куќите. Напроти ваквата питомост и убавина, во неговата родна земја Македонија имало енормно загадување, запалени депонии и други напластени проблеми.

Токму расказот „Самак“ е носечки во неговата книга со дваесеттина раскази распослани на нешто повеќе од педесет страници. Тие ги отсликуваат неколкукратните искуства на Стефановски при престоите во САД или како што рецензентот Панде Манојлов ќе напише неговиот „американски аџилак, каде сѐ е поинаку, сѐ е на место, американски дотерано, многу поинакво од некое македонско, балканско и темновилаетско“.

-Слободата ја доживеав како контрапункт. Тоа лето во едно мачно предизборие и нејаснотии тука, кога ќе ги отворев порталите гледав теми за загдување, запалена депонија, а таму шетаа срни и елени. Сакав да речам дека таа парадигма на слободата, онака како што своевремено големиот француски поет Луј Арагон рекол дека таквиот роман на човештвото му е потребен како лебот. Јас сметам дека таквото слободарство или парадигма на слободата ни е потребна денес и кај нас на овие простори како лебот, сега, секогаш и во сите времиња. Тоа е Самакот всушност- рече Стефановски.

Во книгата со раскази авторот ги пренесува доживувањата од Херман –паркот во Хјустон, Сан Антонио, Алвин, плажата „Мајртл бич“, Нијагара, Пенсилванија и други места. Рецензентот Манојлов запиша дека „насловот на книгата е Блажеконевски, инспириран од неговата песна ‘Елен самак’, но со прозно-поетска Пецестефановска зрелост и стил на врвен новинар-писател, каде зборот е збор, јасен како бел ден, со кристално јасна мисла“.

Запрашан дали ова се однесува и на слободата во новинарството, Стефановски одговори: „слободата на изразот во книгата е голема слобода наспроти новинарската професија со сите стеги и карики е окована, а тие карики треба да пукаат и професијата треба да биде слободна“.

Промоцијата на книгата е закажана за недела во 18 часот во ресторан „Грне“ на Широк Сокак, а еден од поводите е и пензионирањето на Стефановски кој долги години помина работејќи неуморно во новинарството.Сепак, и понатаму  продолжува да работи.