Не е вистина дека симптомите од омикрон варијантата на коронавирусот се нусефекти од „отровна вакцина“. Вакцините не содржат отрови, тие се сигурни, ефикасни и развиени на безбедни платформи. Пред нивната апликација спроведени се низа тестирања од кои е утврдено дека бенефитот од вакцината далекусежно ги надминува несаканите ефекти. Омикрон сојот на коронавирусот е настанат со мутирање на вирусот при што се случува промена на спајк протеинот кој е сменет 32 пати. Ова ја прави омикрон варијантата позаразна, иако засега нема доволно информации да се каже со сигурност каква клиничка слика предизвикува

Рецензираме пост на Фејсбук во кој се изнесени невистинити и медицински непоткрепени тврдења кои се однесуваат на коронавирусот и омикрон варијантата којашто е исклучително вирулентна и станува доминантна во светот.

Народот боледува од отровни вакцини, а тие не убедуваат омикрон та омикрон бил,  се вели во објавата.

Меѓутоа, ова тврдење не е вистинито и тоа може да се покаже на повеќе начини и гледано од повеќе аспекти.

Прво, доколку омикрон варијантата не постои (како што алудира постот), а симптомите од ковид-19 се претставуваат како нусефекти од примена вакцина, тогаш нема да се случува невакцинирани граѓани да се разболуваат од ковид.

Од омикрон варијантата на коронавирусот може да се заразат и вакцинираните и невакцинираните, но фактите од Македонија говорат дека најголемиот дел од заразените се невакцинирани. Директорите на болниците во земјава, кои хоспитализираат ковид позитивни пациенти, се децидни дека хоспитализациите на вакцинираните се поретки, а и кога се случуваат, тие не се со толку тешка клиничка слика како кај невакцинираните.

Омикрон варијантата на коронавирусот е официјално потврдена и од СЗО и е прогласена за варијанта на загриженост. Нејзините симптоми се јавуваат 3 дена по инфекцијата односно контактот со заразено лице, доедека нусефектите од вакцините се појавуваат ден или два по вакцинацијата, тие се благи и се доказ дека телото продуцира имунолошки одговор за да создаде одбрана против идна инфекција со коронавирусот. Од вакцината не може да се заразите со коронавирусот. Омикрон, пак, е мутација на коронавирусот и од неа и тоа како се заразуваат луѓето.

Понатаму, не е точно дека вакцините содржат отрови. Во минатото антивакциналните кругови во повеќе различни наврати, тврдеа дека „отровот” потекнува од различни места, на пример, дека вакцините содржат отров од змија ѕвечарка, но и дека спајк протеинот којшто се создава по инјектирањето на дозата е изворот на „отровот”.

Ниту едното, ниту другото не е точно.

Прво, за ензимот од змијата ѕвечарка. Спроведена е научна студија во која се покажало дека колку опасна ќе биде болеста ковид-19, ќе зависи од еден ензим кој, пак, се вклучува во инфламаторниот одговор. Меѓутоа, во вакцините ниту го има овој ензим ниту, пак, студијата спомнува дека го има!

Дезинформацијата дека во вакцините против ковид има отров, ја разгори и канадскиот лекар Бирам Бридл во овој видео материјал.

Долго време знаевме дека спајк протеинот е токсин што е штетен и може да предизвика штета ако влезе во циркулацијата. Сега имаме докази дека вакцините што прават нашето тело да произведе спајк протеин, односно вакцината и протеинот потоа влегува во циркулација. Тој спајк протеин потоа се врзува за клетките и може да предизвика тромбови или крварење, вели Бридл во своето излагање.

Ова тврдење е дезинформација од две причини. Прво, спајк протеинот што се создава во организмот по вакцинацијата не е ист со оној на коронавирусот. Второ, дури и кога би бил ист, тој е во многу, многу помали дози отколку оној на коронавирусот. Повеќе за ова прочитајте на следниот линк.

Вакцините се безбедни, ефикасни и развиени на безбедни платформи. Пред нивната апликација спроведени се низа тестирања од кои е утврдено дека бенефитот од вакцината далекусежно ги надминува несаканите ефекти. Овде може да прочитате за составот на сите вакцини кои се администрираат во Република Северна Македонија.

Понатаму, антивакциналните кругови проширија и дезинформација дека во вакцината има состојки како графен оксид или луцифераза, наводно отровни за човековиот организам. И тоа се покажа како невистина.

„Асошиејтед Прес“ и нивниот сервис за проверка на факти пишуваат дека луцифераза не може да се најде како состојка во вакцините против ковид-19, но дека ензимот се користи во некои истражувања за ковид-19, затоа што неговата карактеристика да ослободува светлина може да им помогне на научниците визуелно да следат како вакцините и вирусите влијаат на клетките.

Според истражувачите на Универзитетот во Тексас, луциферазата помага да се забрза дијагностичкото тестирање за ковид-19,  па присуството на антителата може да се забележи побрзо отколку кога би користеле други методи.

И „Ројтерс“ пишува дека во ниедна вакцина која се администрира против ковид нема луцифераза.

И на официјалната веб-страница за вакцинација во земјава, каде се наведени состојките на сите вакцини кои се администрираат во С. Македонија, нема луцифераза како состојка.

Ниту графен оксидот не е во листата на состојки во вакцината против ковид-19.

За разлика од вакцините коишто имаат благи несакани ефекти, при состојба на долг ковид организмот со месеци не може да се опорави, па се јавуваат проблеми со дишните патишта, сатурацијата, енергијата, како и невролошки проблеми и појава на исклучителна исцрпеност. Последиците коишто ковид 19 ги остава врз организмот ни оддалеку не може да се споредат со минорните и минливи несакани ефекти од вакцинацијата.

Вакцините дефинитивно не содржат отрови, а омикрон сојот на коронавирусот е настанат со мутирање на вирусот при што се случува промена на спајк протеинот кој е сменет 32 пати. Ова ја прави омикрон варијантата позаразна, иако засега нема доволно информации да се каже каква клиничка слика ќе предизвика.

Поради сите горенаведени факти, оценуваме дека не е вистина дека симптомите на омикрон варијантата на коронавирусот се, всушност, нус ефекти од  „отровна вакцина”.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар