Продолжува работната акција насловена како „Сите за Копанки, Копанки за сите“ со цел обнова на планинарскиот дом што изгоре пред пет години. Планинарско-спортскиот клуб „Пелистер“ кој ја отпочна иницијативата за работните акции на својата фејсбук страница објави и жиро сметка на која сите заинтересирани можат да донираат средства и така да ја помогнат обновата на домот. Работната акција продолжи и викендов, а дел од градежните материјали се транспортираа со помош на жичницата на ски патеката „Копанки“. Работните акции ќе продолжат во текот на целата градежна сезона.