Општина Битола ги заврши потребните постапки за реализација на шест големи проекти, од кои на еден веќе се работи, а за останатите согласно планираната динамика, градежните активности ќе започнат во месец мај.

На врвот на шесте приоритети за овој период е отпочнувањето на реализацијата на капиталниот проект за изградба на нов противпожарен дом со површина на приземје од 386,4 м² и кат 386,4 м², гаража и простор за седум противпожарни возила на површина од 830 м². Вкупната вредност на склучениот договор за изградба на објектот изнесува 52.824.773 денари.

Меѓу големите инвестиции на локалната самоуправа за оваа година е и Проектот за реконструкција на спортската сала во Бистрица, со проценета вредност од 31.200.000 денари.

Реконструкцијата го вклучува приземјето на површина од 286 м² и галерија од 100 м². Приземјето вклучува мултифункционален простор за спортски активности и помошни простории во функција на спортските активности, додека главен дел во галеријата е гледалиштето за културни манифестации.

Инфраструктурните уредувања во општината вклучуваат и изградба на паркинг простор и спортско – рекреативни зони и спортски игралишта.

Дел од овие проекти е реконструкцијата на игралиштата во Основото училиште „Елпида Караманди“, во вкупна вредност од 22.373.885 денари, што вклучува реконструкција на фудбалско игралиште на површина од 1484 м², игралиште за кошарка на површина од 151 м², за одбојка на 262 м², фитнес зона на 220 м² и патека за трчање на површина од 306 м².

Спортски игралишта ќе се реконструираат и во Брусничка населба, за што општината од својот буџет ќе инвестира 3.293.203 денари за реконструкција на тениско игралиште на површина од 550 м², кошаркарско игралиште од 420 м² и фудбалско игралиште од 1005 м².

Додека се работи на овие проекти, соодветно ќе биде уреден и паркинг просторот кај Декорпод на површина од 544 м², а паралелно ќе биде комплетиран и започнатиот проект за изградба на пешачката патека на потегот Тумбе кафе – Смолево во вкупна должина од 1930 метри и поставување на бехатон плочки на површина од 902 м², надополнета со урбана опрема и осветлување со поставување на фотоволтаични панели.