Книгите со кои ќе се збогати библиотечниот фонд на Австриската библиотека се состојат од литература на австриски писатели, германско јазични писатели, методски прирачници за наставници по германски јазик, учебници и работни тетратки во издание на Австрискиот фонд за интеграција, лексикони за австриската книжевност и стручна литература од областа на информатиката по барање на Факултетот за информатички и комуникациски технологии во Битола (ФИКТ).

„Веќе ни премина во традиција, на моите претходници, а и јас сум тука две и пол години, па  секоја година предаваме донации на книги во библиотеката. Во годинешната испорака на библиотечниот фонд акцентот е ставен на Факултетот за информатички и комуникациски технологии. По барање на овој факултет испратена е стручна литература во Австриската библиотека“, рече амбасадорката Ренете Коблер.

Австриската библиотека е сместена во битолската Универзитетска библиотека „Св. Климент Охридски“ и располага со богат библиотечен фонд на книги од германското јазично подрачје.  

„Австриската библиотека е добро сместена во битолската Универзитетска библиотека и добро се служи и користи од нашите читатели. Таа постои од 2001 година и не е само библиотека туку е културен центар во кој што има низа манифесатции, меѓу кои семинар за професори по германски јазик, литературни читања каде што каниме австриски писатели, концерти, изложби. Тоа го организира Австриската библиотека и Австрискиот почесен конзулат во Битола за да биде поприсутна австриската култура и германскиот јазик во Битола“, рече почесната конзулка Илиева.

Директорката на битолската библиотека Јелена Петровска изрази надеж дека и во иднина соработката со конзулката ќе продолжи да биде плодна, па се договараат  промоции на нови книги и наслови од австриското и германското јазично подрачје.

Ученици од ОУ „Елпида Караманди“ од  Битола кои го изучуваат германскиот јазик под раководтство на професорката Билјана Митковска при оваа посета на амбасадорката го презентираат проектот „Читање и преведување на дела од литература за деца и млади - романот ‘Katzenmusik’ од Ренате Велш“.  Овој проект беше еден од оние со кои Австриската библиотека, НУУБ „Св. Климент Охридски“ и Почесниот австриски конзулат во Битола го одбележаа фестивалот „Австрија чита 2018“, а истиот се организира секоја година во Република Австрија и во сите Австриски библиотеки ширум светот.

Учениците на германски јазик претставија биографски податоци од Ренате Велш, австриска писателка за деца и млади, која ќе гостува во Битола во март 2018 година.